Grubi përballet me shkarkim nga Universiteti i Tetovës për mungesë të paarsyeshme

Universiteti i Tetovës ka nisur procedurën ligjore për shkarkimin nga puna të Artan Grubit, i cili mban vendin e punës asistent profesor në Fakultetin Juridik, drejtimi i Gazetarisë. Sipas Safet Emrulit, dekan në Fakultetin Juridik, Artan Grubi, kishte pezulluar vendin e tij të punës shkaku i ushtrimit të funksionit publik edhe atë deri në muajin gusht të këtij viti, kur edhe është kthyer në punë, megjithatë, mungesa prej disa ditësh e tij pa dhënë sqarim nënkupton marrjen e masave ndaj tij.

“Prej javës së kaluar, personi i apostrofuar, nuk është paraqitur në vendin e punës që d.m.th nuk i ka përmbushur detyrimet që i ka nga Ligji për marrëdhënie pune dhe Ligji për arsimin e lartë. Ne kemi proceduar rastin sipas dispozitave ligjore dhe kemi nisur procedurën për masa adekuate sipas ligjit. Shumë shpejt do të njoftoheni për vendimin që do sjellim si universitet”, tha Safet Emrulit, dekan në Fakultetin Juridik.

Juristi Sahit Zylbehari thotë se sipas Ligjit për marrëdhënie pune duhet të bëhet ndërprerja e angazhimit, nëse ndaj të punësuarit ka padi. Sipas tij, ndërprerja duhet të jetë e përkohshme deri në shpalljen e vendimit përfundimtar të gjykatës. I punësuari mund të largohet edhe për mungesë të pajustifikuar.

“Sipas Nenit 82 paragrafi 1 pika 1. mungesa e pajustifikuar nënkupton nëse punëmarrësi tre dit nuk paraqitet në punë, apo për afat pesë ditor brenda një viti në mënyrë të pajustifikuar, punëdhënësi merr veprime që përcakton Ligji, pra prish kontratën. Në raste të tilla punëdhënësi duhet të siguroj dëshmi për mungesën dhe të respektoj procedurat Ligjore për largimin nga puna, dhe për të shmangur mosmarrëveshjet duhet të përcaktohen faktet, njoftimi i punonjësit, zbatimi i procedurës disiplinore, marrja e vendimit për largim nga puna dhe dorëzimi i tij në institucionet kompetente”, tha Sahit Zylbehari, jurist.

Grubi në UT është i angazhuar që nga viti 2012./Alsat/