Greqia në bisedime me Izraelin për të zhvilluar një “Kupolë të Hekurt” në vlerë 2 miliardë euro

Greqia është në bisedime me Izraelin për të zhvilluar një kupolë mbrojtëse kundërajrore dhe raketore prej 2 miliardë eurosh (2.11 miliardë dollarë), pjesë e një përpjekjeje më të gjerë për të modernizuar forcat e saj të armatosura ndërsa rimëkëmbet nga një krizë e zgjatur borxhi, thanë zyrtarët grekë të enjten.

Sipas mediave të huaja, përcjell Telegrafi, ajo ka të ngjarë të imitojë Kupolën e Hekurt të Izraelit dhe sistemet e tjera që “kapin” raketa me rreze të shkurtër dhe të gjatë të lëshuar gjatë sulmeve nga fqinjët e saj në mes të konflikteve të vazhdueshme në Gaza dhe Liban.

Greqia është e prirur të investojë në mbrojtjen e saj “për të qenë në hap” me rivalin historik Turqinë, e cila po zhvillon gjithashtu mbrojtjen e saj ajrore, pavarësisht disa përmirësimeve në marrëdhënie.

“Plani është krijimi i një sistemi anti-ajror dhe anti-drone me shumë shtresa”, tha një burim me njohuri për këtë çështje për Reuters pas një konference me dyer të mbyllura me ministrin grek të Mbrojtjes, Nikos Dendias.

“Ne jemi në diskutime me Izraelin”, ka bërë të ditur burimi.

Një zyrtar i dytë konfirmoi shkallën e marrëveshjes së mundshme, duke shtuar se Greqia duhet të shpenzojë 12.8 miliardë euro deri në vitin 2035 për të modernizuar forcat e saj të armatosura.

Mbrojtja ajrore është pjesë e planit 10-vjeçar të “blerjeve ushtarake” të Athinës që përfshin blerjen e deri në 40 aeroplanëve luftarakë F-35 dhe dronëve të rinj nga SHBA, dhe katër fregata Belharra dhe aeroplanë Rafale nga Franca.

“Përpjekja jonë është për një tranzicion të shpejtë të forcave tona të armatosura në shekullin e 21-të”, citohet të ketë thënë ministri i Mbrojtjes, Dendias para konferencës të së enjtes.

Greqia aktualisht përdor Patriotin amerikan dhe sistemet e vjetra ruse S-300 për të mbrojtur hapësirën e saj ajrore.

Pavarësisht nga një “shkrirje” në marrëdhëniet e trazuara prej kohësh të Greqisë me Turqinë, fqinjin e saj shumë më të madh lindor, të dy vendet mbeten në mosmarrëveshje për një sërë çështjesh, duke përfshirë kufijtë detarë, burimet energjetike dhe hapësirën ajrore në Mesdheun lindor. /Telegrafi/