Goli i Adebayorit i 1.000-të i Arsenalit

Arsenal ka arritur një rekord impozant gjatë fitores 3-1 ndaj Readingut, të hënën më 12 nëntor, dhe i është bashkuar kështu Manchester United, si klub i vetëm i Premierligës që ka shënuar mbi 1.000 gola.

Kur Emmanuel Adebayor çoi topin në rrjetë, për të dytën herë, nga tre golat e Arsenalit ndaj Readingut në Madejski Stadium, pati veçantinë të shënonte golin e 1000-të të Premierligës për topçinjtë.

Arsenal kështu bëhet vetëm ekipi i dytë, pas Manchester United, që arrin numër katërshifror të golave të shënuar që nga formimi i Premierligës, në vitin 1992.

Jo shumë për të befasuar, por i ashtuquajturi “Katërshi i madh” ka dominuar në shënimet e golave në ligën më të fortë angleze që nga krijimi i saj. Liverpool dhe Chelsea janë në rrugë për të arritur 1.000 golashin, ndoshta sezonin e ardhshëm.

Edhe Newcastle ka qenë mjaft produktiv sa i përket shënimit të golave. Ky klub qëndron i pesti në tabelë, pavarësisht se ka luajtur një sezon më pak në Premier Ligë (të parin), krahasuar me katër ekipet tjera.

Pasi që Adebayor shënoi golin e njëmijtë për Arsenalin, Alexander Hleb filloi mileniumin e ri me golin e tretë të topçinjve kundër Readingut.

Arsenal ka shënuar në çdo ndeshje të Premierligës gjatë këtij sezoni, por është ende larg Manchester United, sa i përket numrit total të golave të shënuar në Premierligë. United grumbullon gjithsej 1.163 gola, me nëntë titujt të fituar në 15 sezone të Premierligës.