Golden State dhe Boston Celtics regjistrojnë fitore

Golden State Warriors kanë regjistruar fitoren e radhës në NBA, duke mposhtur Memphis Grizzlies me rezultat 106-94 në “Oracle Arena”.

Klay Thompson me 31 pikë dhe Stephen Curry që shtoi 21 pikë të tjera, ishin më të mirët për vendasit, që vazhdojnë të ndiejnë presionin e San Antonio Spurs për vendin e parë në Konferencën e Perëndimit. Për Memphis spikati Conley me 29 pikë, gjashtë asistime dhe një top të kontrolluar nën tabelë. Grizzlies me këtë humbje të tretë radhazi rrezikojnë zonën ‘play off’.

Miami Heat shkoi deri +15 pikë avantazh në “TD Garden Arena” ndaj Boston Celtics, por në fund u dorëzua me rezultatin 112 – 108, falë formës së shkëlqyer të Isaiah Thomas, që shënoi 30 pikë në total. Crowder shtoi 25 pikë të tjera për Celtics, që janë shumë pranë vendin të parë në Konferencën e Lindjes, ku vazhdon të kryesojë Cleveland Cavaliers. Nga ana tjetër skuadra nga Florida mund të humbasë zonën ‘play off’ nëse në ndeshjet e mbetura nuk arrin të mbajë poshtë në renditje Chicago Bulls, transmeton SuperSport.

Indiana Pacers ndërkohë mposhti 107-94 Philadelphia 76-ers, për të forcuar pozitat në zonën ‘play-off’. Në këtë përballje nuk spikatën individualitetet, aq sa më miri për nga statistikat rezultoi Paul George me vetëm 21 pikë, tri asistime dhe tetë rikuperime.

Anthony Davis me 31 pikë, tri asistime dhe 15 topa të kontrolluar nën tabelë udhëhoqi New Orleans Pelicans në fitoren 90-115 në parketin e Dender Nuggets. Vendasit ruajtën disi ekuilibrat në periodën e parë, më pas kishte vetëm një skuadër mbi parket. Me këtë sukses Pelicans rritin shpresat për një vend në zonën ‘play-off’ në Konferencën e Perëndimit.

Pëson humbjen e 52-të gjatë sezonit të rregullt Los Angeles Lakers. Në “Staples Center” kalofornianët dështuan 81-97 ndaj Portland TrailBlazers, që ngjitet në vendin e tetë në Perëndim. Lillard fitoi duelin me Russell, edhe pse të dy shënuan nga 22 pikë. Ylli i Blazers dha gjithashtu pesë asistime dhe kontrolloi shtatë topa poshtë koshit.