Me golat e tij ndihmoi ‘ringjalljen’ e Ferizajt, Abdul: Së bashku do arrijmë rezultate më të mira

Me tri fitore dhe një barazim në katër ndeshjet e fundit, Ferizaj duket se ka filluar të sheh ‘dritë në fund të tunelit’ pas një serie negative të rezultateve.

Kjo ngritje në formë pas pesë humbjeve radhazi, ka bërë që ata tashmë të ngjiten në pozitën e shtatë në tabelë me 14 pikë të grumbulluara pas 11 ndeshjeve të zhvilluara.

Një prej lojtarëve që ka kontribuar në këtë formë pozitive të ferizajasve është padyshim sulmuesi Abdeen Temitope Abdul, i cili ka shënuar në tri prej këtyre katër takimeve.

Në një intervistë për Telegrafin ai ka rrëfyer shumëçka – që nga përvoja e tij në Kosovë, forma aktuale si dhe dallimet mes ligës së Shqipërisë dhe asaj të Kosovës, duke qenë se në të kaluarën ka luajtur për Skënderbeun.

“Ne kemi qenë në një formë të mirë së fundmi. Të fitosh tri ndeshje rresht dhe të barazosh një tjetër është një besim i madh për lojtarët dhe ka ngritur moralin tonë. Unë jam i lumtur që kam shënuar në tri prej këtyre ndeshjeve dhe kam ndihmuar skuadrën time të marrë pikët e dëshiruara”.

“Kur je një sulmues ju gjykoheni në bazë të golave, por është e rëndësishme të qëndrosh me këmbë në tokë”, ka thënë fillimisht Abdul kur u pyet për ngritjen në formë të Ferizajt.

“Ne jemi një skuadër që jemi promovuar sezonin e kaluar, kështu që është e rëndësishme të marrim tri pikët në çdo ndeshje që luajmë. Tri pikë nuk janë aspak të lehta për t’u marrë në Superligën e Kosovës”.

“Ferizaj është një skuadër me histori të mirë dhe me tifozë që e mbështesin vazhdimisht atë. Jam i sigurt që së bashku mund të arrijmë rezultate edhe më të mira”.

Abdul tutje shprehet se është përshtatur mjaft mirë në Kosovë dhe për këtë e ka ndihmuar fakti që më herët ka luajtur në Shqipëri.

“Unë jam përshtatur mirë në Kosovë, njerëzit më kanë pritur mirë dhe unë e kam gjetur formën më të mirë së fundmi. Fakti që kam luajtur në Shqipëri më ka dhënë një ide se çfarë do më pret në Kosovë. Më pëlqen kultura dhe njerëzit këtu. Nuk mund të ankohem aspak për kohën time në Kosovë deri më tani”, potencoi ai.

Në vazhdim Abdul deklaron se përveç shënimit të golave, për të është e rëndësishme që t’i ndihmojë edhe bashkëlojtarët, pasi këtë duhet ta bëjë një sulmues modern.

“Kur bie fjala tek shënimi i golave unë kam objektivat e mi dhe numrat që do të doja t’i arrija, por më e rëndësishmja është t’i fitojmë ndeshjet”.

“Mendoj se aftësitë e mia mund të ndihmojnë edhe të tjerët të shënojnë po ashtu, pasi një sulmues modern duhet të jetë në gjendje të dhurojë asistime për bashkëlojtarët gjithashtu”.

Për fund 29-vjeçari tha se nuk ka ndonjë dallim të madh mes ligës së Kosovës dhe asaj të Shqipërisë, përveç aspektit taktik të lojës që sipas tij është më i theksuar në Shqipëri.

“Diferenca mes ligës në Kosovë dhe në Shqipëri nuk është shumë e madhe. Do të thosha se dallimi më i madh qëndron tek aspekti taktik i ndeshjes, i cili është më i theksuar në Shqipëri dhe skuadrat janë taktikisht dhe teknikisht më të fokusuara”, përfundoi ai./Telegrafi/