Goditja e avokatit të Berishës, Rithemelimi akuzon Ramën

Zëdhënësja e grupimit të Sali Berishës, i njohur si Rithemelimi, Floriana Garo, ka reaguar në lidhje dhunimin që iu bë mëngjesin e kësaj të mërkure avokatit Sokol Mëngjesit, mbrojtësit ligjor të ish-kryeministrit.

Përmes një deklarate për media, Garo, e drejton gishtin nga kryeministri Rama, i cili sipas saj është personi që ka urdhëruar tre personat të godisnin me levë avokatin.

Garo shton se arsyeja pse kryeministri dhunoi avokatin e Berishës është që të fshehë krimet politike dhe të frikësojë zërin e të vërtetës.

“Sot ne mëngjes, tre bandite, te urdhëruar nga Edi Rama, kane sulmuar dhe goditur me leva në kokë në qendër të Tiranës, profesor Sokol Mëngjesin, avokati i mirënjohur i kryetarit të Partisë Demokratike, Sali Berisha.

Lexo po ashtu Goditet avokati i ish-kryeministrit Berisha, autorët ende të paidentifikuar

Ky është një akt kriminal dhe hakmarrje e verbër, primitive e Edi Ramës ndaj profesor Sokol Mëngjesit, sepse ai së bashku me kolegët e tij, faktuan para shqiptarëve me prova dhe dokumente zyrtare të pakundërshtueshme, se procesi gjyqësor kundër kryetarit të Partisë Demokratike është një proces kryekëput politik i bazuar ne një piramidë mashtrimi, siç është çështja e Klubit Sportiv Partizani.

Duke e goditur me banditë, me urdhër të tij direkt profesor Mëngjesin, dhe duke i shkaktuar atij lëndime të renda, Edi Rama dëshmon frikën dhe panikun që përjeton nga aktet e tij politike kriminale.

Ai beson se me dhunë do mund të frikësojë zërin e të vërtetës dhe fshehë krimet e tij politike.

Me këtë rast, në emër të Partisë Demokratike dënoj me ashpërsinë më të madhe këtë akt banditesk kriminal ndaj profesor Sokol Mëngjesit dhe deklaroj sot se, Edi Rama, ai dhe vetëm ai, personalisht do mbahet përgjegjës për këtë akt të shëmtuar kriminal”, thekson Garo në deklaratën e saj. /Telegrafi/