Gjukanoviq: E mbështesim rrugën evropiane të Kosovës

Presidenti i Malit të Zi, Millo Gjukanoviq, pas takimit që pati me presidenten e Kosovës, Vjosa Osmani, tha se vendi i tij mbështet ambiciet e Kosovës për anëtare të Këshillit të Evropës dhe marrjen e statusit të vendit kandidat në BE.

Gjukanoviq tha se deficiti themelor i rajonit mund të eliminohet vetëm përmes integrimit.

“Prandaj edhe vullneti ynë për të bashkëpunuar për këto çështje me të gjithë fqinjët tanë. Ne besojmë se kjo është mënyra e vetme për të forcuar stabilitetin”, tha Gjukanoviq.

Ai shtoi se në këtë kontekst, Mali i Zi i kupton ambiciet e Kosovës për t’u bërë anëtare e Këshillit të Evropës.

“Ne e kuptojmë iniciativën e tyre për të marrë statusin e kandidatit për në BE. Ne e mbështesim fuqimisht dhe mendojmë se është e vetmja qasje e përgjegjshme ndaj ambicieve të Kosovës dhe çdo vendi tjetër në rajon”, tha Gjukanoviq, raporton RTCG.

Siç vlerësoi ai, regjimi pa viza për qytetarët e Kosovës është hapi i parë i rëndësishëm.

Gjukanoviq tha se ai dhe presidentja Osmani kanë biseduar edhe për çështje bilaterale dhe se janë të kënaqur sepse marrëdhëniet janë thelbësore, cilësore dhe miqësore, por se ka hapësirë ​​të qartë për përmirësime të mëtutjeshme, transmeton Telegrafi.

Lexo po ashtu Osmani në Mal të Zi: E ardhmja e vendeve tona është në BE

Presidentja Osmani tha se Mali i Zi deri më tani ka treguar mbështetje të qartë për Kosovën në të gjitha fushat.

“Mali i Zi dhe Kosova janë shtete sovrane dhe qartësisht të përkushtuara në rrugën e anëtarësimit në BE. Ne do të vazhdojmë të punojmë me synimin për të zgjidhur çështjet e së kaluarës sonë të dhimbshme. Ne do të vazhdojmë në rrugën e paqes dhe stabilitetit”, tha ajo. /Telegrafi/