Gjithçka gati për sezonin e ri të “Detektivi” – Edita Doli flet për risitë e kuizit të shumëpritur nga shikuesit e RTV Dukagjini

Duke filluar nga nesër (e hënë) në ekranin e RTV Dukagjini, do të rikthehet emisioni i shumëpritur “Detektivi”.

Nën drejtimin e prezantueses Edita Doli, “Detektivi” edhe këtë sezon për 30 ditë rresht do të sjellë para shikuesve aftësitë gjurmuese të shqiptarëve për të zbuluar të vërtetat e ngjarjeve të ndryshme.

Në një bisedë për Telegrafin, drejtoresha e programacionit në RTV Dukagjini dhe njëherësh prezantuesja e “Detektivit”-it, Edita Doli, tregoi risitë që ky emision ka sjell këtë sezon.

“Kemi bërë përgatitjet intenzive dhe jemi gati për të filluar tashmë sezonin e dytë. Risi në këtë sezon është poligrafi (makina e së vërtetës), e cila do të ndihmojë në zbardhje ne vërtetësisë në përgjigjen e garuesve. Besoj do të jetë interesant dhe do t’i japë një kahje pak më ndryshe lojës”, ka thënë Doli për Telegrafin.

View this post on Instagram

A post shared by EDITA DOLI (@editadoli)

Ndonëse gjendet çdo ditë pranë shikuesve dhe dëgjuesve të RTV Dukagjinit përmes emisionit të saj “Radar”, Edita shprehet se eksperienca me emisionit “Detektivi” është e veçantë dhe mezi pret që të nisë me këtë sezon të ri.

“Mezi po pres, jam shumë e emocionuar për sezonin e ri. Besoj do të jetë një rrugëtim i veçantë me shumë garues dhe aq sa është për mua, besoj emocionues do të jetë edhe për ata që na ndjekin”, thekson prezantuesja.

Që në nisjen e tij në sezonin e parë, “Detektivi” zgjoi një interesim të madh te shikuesit.

Formula e veçantë e garimit por edhe premia kryesore në fund ishin elementet që tërhoqën shikuesit, duke pyetur vazhdimisht për nisjen e sezonit të ri.

“Që nga viti i kaluar kur doli për herë të parë, ‘Detektivi’ ka ngjallur një interesim të jashtëzakonshëm me njerëzit që vazhdimisht na pyesnin se kur do të fillonte sezoni i ri, dhe më në fund ja ku jemi – në një sezon të dytë përplot emocione dhe befasi për ta”, tregoi Edita.

Duke filluar nga e hëna e 9 gushtit, “Detektivi” do të transmetohet çdo natë në 22:15 në RTV Dukagjini dhe në rrjetet sociale të emisionit. /Telegrafi/

View this post on Instagram

A post shared by EDITA DOLI (@editadoli)