Gjermania ka akuzuar Rusinë për një sulm kibernetik ndaj kontrollit të trafikut ajror dhe për përpjekje për ndërhyrje në zgjedhje, si dhe ka thirrur ambasadorin rus në takim.
Një zëdhënës i ministrisë së jashtme tha se inteligjenca ushtarake ruse ishte pas një “sulmi kibernetik kundër kontrollit gjerman të trafikut ajror në gusht 2024”.
Zëdhënësi akuzoi gjithashtu Rusinë se po përpiqet të ndikojë dhe destabilizojë zgjedhjet federale të vendit në shkurt të këtij viti.
Akuzat e fundit vijnë mes shqetësimit të shtuar në Evropë lidhur me sulmet e dyshuara kibernetike ruse që kur Moska nisi pushtimin e plotë të Ukrainës në vitin 2022.
Ministria e jashtme shtoi se Gjermania - në koordinim të ngushtë me partnerët e saj evropianë - do të përgjigjet me kundërmasa për ta bërë Rusinë "të paguajë një çmim për veprimet e saj hibride".
Bëhet e ditur se vitin e kaluar, si Mbretëria e Bashkuar ashtu edhe Rumania e kanë akuzuar Rusinë për ndërhyrje në punët e tyre të brendshme, duke përfshirë shënjestrimin e organizatave që ofrojnë ndihmë të huaj në Ukrainë dhe në zgjedhjet presidenciale.
Zëdhënësi tha se sulmi kibernetik i gushtit 2024 ndaj Gjermanisë mund t'i atribuohet grupit të hakerëve rusë Fancy Bear.
“Gjetjet tona të inteligjencës vërtetojnë se shërbimi i inteligjencës ushtarake ruse GRU mban përgjegjësi për këtë sulm”, shtoi ai.
Zëdhënësi i ministrisë shtoi se tani ishte e sigurt se Moska ishte përpjekur të “ndikonte dhe destabilizonte si zgjedhjet e fundit federale ashtu edhe punët e brendshme të vazhdueshme të Republikës Federale të Gjermanisë” përmes një fushate dezinformimi të quajtur Stuhia 1516.
Fushata, tha ajo, ishte përqendruar pjesërisht te kandidati kryesor i Partisë së Gjelbër, Robert Habeck, dhe kandidati kryesor i CDU-së, Friedrich Merz, i cili tani është kancelar.
Qeveria gjermane tha se agjencitë e sigurisë kishin identifikuar video të rreme që pretendonin manipulimin e fletëvotimeve si pjesë të një përpjekjeje ruse për dezinformim vetëm disa ditë para zgjedhjeve.
Ofruesi i shërbimit të navigimit ajror konfirmoi se komunikimi i zyrës ishte hakuar në gusht 2024. Ai tha se fluturimet nuk ishin prekur.
Ndryshe, Gjermania është shfaqur si një nga mbështetëset më të zëshme të Ukrainës, duke ofruar mbështetje ushtarake, financiare dhe diplomatike për Kievin.
Kancelari Friedrich Merz ka bërë thirrje të fortë që asetet e ngrira ruse të përdoren për të ndihmuar në mbrojtjen e Ukrainës.
Ai gjithashtu e ka akuzuar vazhdimisht Rusinë për luftë kibernetike kundër vendit të tij. /Telegrafi/
