Gjendet lëndë plasëse në Shkodër, u hodh nga të rinjtë që po ndiqeshin nga policia

Një pako me lëndë të dyshuar plasëse është gjetur nga policia në lagjen “3 Heronjtë”, në Shkodër.

Sipas njoftimit të Policisë së Shkodrës, dyshohet se lënda plasëse është hedhur para disa ditësh nga dy persona me motor, gjatë momenteve kur ata po ndiqeshin nga efektivët pasi nuk iu bindën urdhrit të ndalimit.

“Në vijim të informacionit të dhënë më datë 26.03.2025, për arrestimin e shtetasve M. T. dhe D. S., të cilët nuk iu bindën urdhrit të Policisë për të ndaluar motomjetin me të cilin lëviznin, me targë të vjedhur dhe me numër shasie të ndryshuar, bëjmë me dije se nga kontrollet e kryera në vijim të veprimeve hetimore për këtë rast, dje, në lagjen “3 Heronjtë”, është gjetur një pako me lëndë të dyshuar plasëse, e cila dyshohet se është hedhur aty nga këta shtetas më datë 26.03.2025. Pakoja u sekuestrua në cilësinë e provës materiale,” thuhet në njoftimin e kësaj të marte nga policia.

Kujtojmë se Policia e Shkodrës arrestoi dy të rinjtë të cilët po lëviznin me motomjet me targë të vjedhur në Tiranë dhe numër shasie të ndryshuar, më datë 26 mars të këtij viti.

Gjatë patrullimit, efektivët konstatuan në lagjen “Ndoc Mazi” një motomjet që lëvizte me shpejtësi dhe i bënë shenjë ndalimi. Por, 32-vjeçari i cili drejtonte motomjetin nuk iu bind urdhrit të Policisë duke u larguar së bashku me pasagjerin.

Shërbimet e Policisë i janë vënë në ndjekje dhe e kanë ndaluar motomjetin, duke vendosur në pranga dy të rinjtë nga Shkodra.

Gjithashtu, janë kryer kontrolle në automjetet e dy shtetasve, ku janë gjetur një bidon me lëndë djegëse, një silenciator dhe një sasi kokaine.