Gënjeshtrat më të mëdha nga Koreja e Veriut: Familja e Kimit nuk shkon në tualet, kanë fituar kampionatin botëror të futbollit (Foto/Video)

Lajmet e rrejshme së fundmi janë bërë problem global, e në veçanti kur kemi të bëjmë për tema apo ngjarje serioze, që për fat të keq mund t’i besojë bota. Dhe për këtë liderët botërorë janë duke bërë thirrje që të ndalet shpërndarja e tyre.

Por është pikërisht Koreja e Veriut që vazhdimisht publikon lajme të rreme përmes mjeteve të saj propaganduese, kinse ky vend është i paprekshëm dhe është një nga më të fuqishmit, transmeton Telegrafi.

Lideri i Koresë së Veriut, Kim Jong-un ka vazhduar traditën e gjyshit dhe babait të tij, të cilët gjithashtu sa ishin në pushtet gjithmonë kishin “ushqyer” qytetarët me informacione të pasakta, që i shkonin për shtati kësaj familje sunduese.

Koreja e Veriut në kampionatin botërorë të futbollit

Autoritet e këtij vendi në vitin 2010, i janë drejtuar qytetarëve të saj se si kinse kishin fituar kupën në kampionatin botëror të futbollit. Në videon që ua kishin shfaqur qytetarëve, mund të shiheshin lojtarët duke qarë nga gëzimi që kishin fituar vendin e parë.

Por, e vërteta është se përfaqësuesja e tij nuk kishte fituar as edhe një pikë në fazën e grupeve.

Medalja e artë olimpike

Ata kanë dëshirë të njihen në botë si një komb me shpirt sportisti. Kështu Koreja e Veriut është munduar ta bind popullin, se atleti i tyre kishte fituar medaljen e artë në Lojërat Olimpike në Sydney.

Por është interesant fakti se si Koreja e Veriut në këto lojëra kishte fituar katër medalje – një të argjendtë dhe tri të bronzta, por askush nuk i kishte përmendur ato.

Kanë zbuluar njëbrirëshin

Agjencia qendrore e lajmeve e Koresë së Veriut kishte njoftuar në vitin 2012, se arkeologët kishin gjetur gjurmë të njëbrirëshit jo larg nga Pyongyang. Gjithashtu kanë bërë të ditur se njëbrirëshit i kishin kalëruar mbretërit e lashtë korean.

Kanë shpikur alkoolin që nuk i bën të dehen

Ata me krenari kishin njoftuar se shkencëtarët e tyre kishin prodhuar alkoolin, pas konsumimit të cilit do të ndiheshin sikur të mos kishin konsumuar edhe as edhe një pikë alkool.

Një revistë shtetërore e kishte botuar këtë lajm, por për fat të keq nuk ishte besuar nga masa, pasi edhe sot e kësaj dite në Korenë e Veriut importohen sasi të mëdha të alkoolit.

Kim Jong-Il ka thyer rekordin botëror në golf

Në vitin 1944 ishte përhapur një lajm se babai i Kim Jong-un, Kim Jong-il kishte thyer rekordin botëror në golf. Kishin shkruar se ai kishte lindur si talent i rrallë për golf, transmeton Telegrafi.

Kim Jong-Il është ikonë botërore e modës

Në vitin 2010 ishte shfaqur një lajm, që Kim Jong-il është bërë ikonë botërore e modës, dhe kinse të gjithë kanë filluar ta imitojnë në stilin e veshjes. Regjimi madje kishte “prodhuar” lajmin kinse një stilist i famshëm francez e kishte falënderuar liderin për “stylingun”.

Familja e Kim nuk shkon në tualet

Është normale që çdo person te ketë nevoja themelore  fizike, këtu përfshihen edhe njerëzit që janë në krye të një shteti. Megjithatë, në Korenë e Veriut sipas propagandës së tyre, gjëra janë më ndryshe.

Kim Il Sung dhe Kim Jong-il thuhet se kurrë nuk kishin shkuar në tualet. Kjo thuhet se u ka ndihmuar të sigurojnë statusin hyjnor tek populli i tyre.

Megjithatë, Kim Jong-un kishte hequr dorë nga ky lloj rrëfimi. Raportohet se pas tij qëndron gjithmonë një burrë që bartë me vete tualetin personal kudo që ai lëviz. /Telegrafi/