Gashi i reagon ashpër Aliut: Paranoja juaj për shpata e sharra po e shkatërron këtë vend, ne nuk i nënshtrohemi klithmave e britmave tuaja

Në seancën e Kuvendit të Kosovës, ku në rend dite është Buxheti për vitin 2021 ka pasur përplasje mes deputetëve të LVV-së dhe atyre të LDK-së.

Fillimisht ka qenë deputeti i LVV-së, Liburn Aliu i cili akuzoi koalicionin qeverisës se po tenton të ndajë pasurinë e Kosovës me Serbinë.

Aliu tha se sa herë që LDK flet për interes nacional madhor, atëherë nga përvoja menjëherë duhet me shiku anash ku po ndezët sharra.

Pas kësaj ka reaguar shefi i Grupit Parlamentar të LDK-së, Arben Gashi, shkruan Telegrafi.

Lexo po ashtu Aliu, LDK-së: Sa herë që flisni për interes nacional, ju e ndizni sharrën diku

Gashi shtoi se paranoja e sharrave, e thikave, dhe e shpatave mbi torte vazhdon dhe se kjo paranojë kjo sëmundje psikike po e shkatërron këtë vend.

“Ju të nderuar kolegë me këto paranoja, britma e klithma po tentoni ta terrorizoni këtë popull. Por ky popull nuk i nënshtrohet thirrjeve dëshpëruese të juaja, nuk do t’i nënshtrohet asnjëherë paranojave tuaja”, tha Gashi.

Ai u tha deputetëve të LVV-së se paranoja se Amerika po tenton ta zhbëjë shtetin e Kosovë do t’u mbes në fyt.

“Paranoja se Amerika po don me zhbë shtetin e Kosovës ka lind nga ju dhe do tu mbetet në fyt ju. Paranoja se në këtë buxhet ka një sharrë, është turp dhe jetoni me këtë turp. Kur i drejtohemi vendit dhe Kuvendit duhet të jeni të sinqertë, por juve ju mungon sinqeriteti sepse bazoheni në pafytyrësi”, tha Gashi.

Gashi shoti se Kosova nuk qeveriset me votat e Facebook-ut.

“E di që klithni e bërtisni, por klithma dhe britma juaj është më e vogël sesa dëshira juaj për ta mbrojtur këtë vend. E ne do të jemi këtu për ta mbrojtur këtë vend. Ne nuk do t’i nënshtrohemi asnjë lloj klithme, paranoje, sharre, shpate mbi tortën e Kosovës. Ky vend nuk do ti nënshtrohet asnjëherë të vetëm këtij mentaliteti bolshevik”, tha Gashi. /Telegrafi/