​Gashi: Kurti nuk i duhet Kosovës, sanksionet nga ShBA-ja janë të rrezikshme për Kosovën

Sanksionet e Shteteve të Bashkuara të Amerikës karshi Kosovës pas situatës së tensionuar në veri të vendit, Lidhja Demokratike e Kosovës i vlerëson si jashtëzakonisht të rrezikshme. Dhe sipas kësaj partie, Kosova në asnjë rrethanë nuk duhet të vijë në një moment të përballet me sanksione nga ShBA-ja.

Pas mbledhjes së Kryesisë së Kuvendit, shefi i Grupit Parlamentar të Lidhjes Demokratike të Kosovës, Arben Gashi, tha se situata në veri të vendit është delikate.

Teksa kërkoi sjellje të vetëdijshme politike karshi situatës së krijuar në komunat veriore, Gashi theksoi se kryeministri i Kosovës, Albin Kurti po sillet në mënyrë tekanjoze dhe të paarsyeshme.

Lexo po ashtu ​LDK: Institucionet të sigurohen që asnjë veprim të mos bëhet pa koordinim me aleatët

“Situata nëpër të cilën po kalon vendi është jashtëzakonisht delikate, prandaj ne nuk mund të sillemi sikur nuk po ndodh asgjë. Ajo çka po shohim këto ditë në pjesën veriore të vendit është jashtëzakonisht e ndjeshme dhe kërkon sjellje të vetëdijshme politike dhe po ashtu veprime, të cilat janë në interes të vendit”.

“Kryeministri i Kosovës për momentin duket se ka një sjellje tekanjoze dhe të paarsyeshme sidomos me deklaratat të cilat i bën në drejtim të zyrtarëve më të lartë të vendeve partnere, të cilat janë të panevojshme, të paarsyeshme, të palogjikshme dhe absurde. Pra, një kryeministër i tillë nuk i duhet Kosovës, një sjellje e tillë e Kosovës me partnerët ndërkombëtarë nuk i duhet hiç se hiç, neve sot më shumë se kurrë na duhet uniteti i brendshëm dhe bashkëpunimi i palëkundur ndërkombëtar”, tha ai.

Lidhur me sanksionet e ShBA-së karshi Kosovës, Gashi konsideron se këto sanksione janë diçka e rrezikshme për Kosovën.

Sipas tij, raportet e punës në mes kryeministrit Kurti dhe ShBA-së janë të lënduara.

Ai theksoi se institucionet e vendit duhet të shohin interesin shtetëror dhe të punojnë në ruajtjen e raporteve me ShBA-në.

“Sanksionet janë diçka jashtëzakonisht e rrezikshme për Kosovën mendoj se Kosova në asnjë rrethanë nuk duhet të vijë në një moment kur përballet ndërkombëtare sidomos me sanksione nga SHBA…Si duket nga ajo që ju dhe ne kemi informacione është informacion i pjesshëm raportet e punës me kryeministrin si duket raportet me kryeministrin e Kosovës janë të lënduara në raport me SHBA-të dhe partnerëve ndërkombëtar, prandaj edhe ka ardhur deri tek kjo situatë, sepse raportet e tyre të punës si duket nuk kanë besim reciprok dhe mirëbesim…”.

“Edhe deklarata e parë dhe e dytë e sekretarit Blinken po ashtu janë shqetësuese, por mendoj se Kosova duhet të shohë interesin shtetëror, institucionet e Kosovës duhet të shohin interesin shtetëror dhe të ruajnë raportet me SHBA-të, pra është interes shtetërore ruajtja e raporteve me SHBA dhe në këtë rast institucionet e kanë këtë përgjegjësi”, tha ai.

Sipas deputetit të LDK-së, opozita nuk po hesht karshi gjendjes së krijuar në veri të Kosovës dhe se në vazhdimësi ka përkrahur institucionet e Kosovës.

Ai tha se nëse opozita do të dilte me sugjerime konkrete kjo do të ishte e dëmshme për vendin.