Foshnja njëmuajshe, doktoresha Hasbahta tregon sa herë duhet të ushqehet me gji në 24 orë

Doktoresha e foshnjave, Teuta Hasbahta ka bërë të ditur se përcaktimin e frekuencës së ushqyerjes të të porsalindurit në muajin e parë e bën nëna, jo i porsalinduri, pasi sipas saj, në këtë periudhë foshnjat kryesisht flenë.

Hasbahta në podcastin “Shëndeti në rend të parë” theksoi se foshnja në muajin e parë duhet të ushqehet minimumi 8 herë në 24 orë, që i bie të paktën çdo tri orë.

“…Çdo tri orë gjithsesi…”, tha ajo.

Ajo tha se në muajin e parë foshnja duhet të zgjohet nga gjumi për tu ushqyer pasi nëse nuk ushqehet me gji të paktën çdo tri orë mund të dehidrohet.

Doktoresha tha se ka foshnja që nguten duke u ushqyer dhe pastaj flenë tri orë dhe këtë e quajnë si thithje aktive.

Por, sipas saj, ka foshnja që duan të pinë pak e shpesh dhe kjo sipas saj është më telashe për foshnjën dhe nënën.

“Nënat gji dhënëse duhet me pas shumë durim…”, tha ajo, gjersa shtoi se është shumë me rëndësi që nënat para se të japin gji të marrin një pozicion të rehatshëm që ia mundëson të jetë komod edhe për 40 minuta.

Sipas doktoreshës, qumështi i gjirit është i pazëvendësueshëm për foshnjat.

“…Natyra e ka krijuar, janë hormonet dhe është adekuat për foshnjat… formulat mirë që janë, por qumështi i gjiri është i pazëvendësueshëm, sidomos në dhurimin e antitrupave…”, tha ajo.

Sipas saj, një i porsalindur është fragjil, e ka sistemin imunitar fragjil, ndërkaq qumështi i gjirit përveç që i ka të mirat ushqyese, i ka edhe ato emocionale.

Ajo thekson tutje se nuk është e njëjtë mbështetja emocionale sikur ndaj atyre që ushqehen me gji, si ndaj atyre që janë me biberon.

Podcasti “Shëndeti në rend të parë” mbështetet nga kompania Muqa Solar.

Podcastin e plotë ku doktoresha Hasbahta flet për kujdesin ndaj të porsalindurve mund ta shikoni në kanalin e Telegrafit në YouTube. /Telegrafi/