Forcat Ajrore të Kinës publikojnë një video që tregon “sulmin e simuluar mbi bazën amerikane në Guam”

Forcat ajrore të Kinës kanë lëshuar një video që tregon bombarduesit H-6 duke kryer një sulm të simuluar në atë që duket të jetë Baza e Forcave Ajrore Andersen në ishullin Guam të Paqësorit të SHBA, ndërsa tensionet rajonale rriten.

Sipas Reuters, përcjell Telegrafi, pamjet, të lëshuara të shtunën në llogarinë e Forcës Ajrore të Ushtrisë Çlirimtare të Popullit në Weibo, erdhi ndërsa Kina zhvilloi një ditë të dytë stërvitjesh pranë Tajvanit të pretenduar nga kinezët, për të shprehur zemërimin për vizitën e një zyrtari të lartë të Departamentit të Shtetit të SHBA-së në Taipei.

Guam është shtëpia e objekteve kryesore ushtarake të SHBA, duke përfshirë bazën ajrore, e cila do të ishte thelbësore për t’iu përgjigjur çdo konflikti në rajonin Azi-Paqësor.

Siç shkruan më tej Reuters, videoja mbi dy minutëshe e forcave ajrore kineze, e vendosur me muzikë në sfond, dramatike si për një film të Hollivudit, tregon bombarduesit H-6 duke u ngritur nga një bazë e shkretëtirës.

Videoja quhet “Zoti i luftës H-6K shkon në sulm!”.

https://www.youtube.com/watch?time_continue=1&v=fj1wCjIitIU&feature=emb_logo

Në gjysmë të rrugës, një pilot shtyp një buton dhe lëshon një raketë në një pistë të panjohur bregdetare.

Muzika papritmas ndalet ndërsa shfaqen imazhet e lëkundjes së tokës, pasuar nga pamjet ajrore të një shpërthimi.

“Ne jemi mbrojtësit e sigurisë ajrore të mëmëdheut; ne kemi besimin dhe aftësinë për të mbrojtur gjithmonë sigurinë e qiellit të mëmëdheut”, kanë shkruar Forcat Ajrore në një përshkrim të shkurtër të videos.

Reuters shkruan se as ministria e mbrojtjes e Kinës, e as komanda amerikane indo-paqësore menjëherë nuk iu përgjigjën kërkesave për komente rreth videos.

Collin Koh, një studiues në Institutin e Mbrojtjes dhe Studimeve Strategjike të Singaporit, tha se videoja synonte të theksonte aftësitë në rritje të Kinës.

“Videoja ka për qëllim të paralajmërojë amerikanët se edhe pozicionet e supozuara të sigurta si Guam mund të rrezikohen kur shpërthejnë konfliktet mbi pikat e nxehta rajonale, qoftë Tajvani apo Deti i Kinës Jugore”, tha ai. /Telegrafi/