Fillon mësimi në një shkollë të Gjakovës, përçahen mësimdhënësit (Video)

Mëngjesin e së mërkurën nxënësit e shkollës “Ahmet Rustemi” në fshatin Bec të Gjakovës iu kthyen bankave të shkollës.

Kjo pasi që disa mësimdhënës bashkë me drejtorinë e shkollës kanë marrë vendim të fillojnë mësimin, që sipas tyre është bërë me kërkesë të prindërve.

“Absolut jemi kthyer në shkollë pa ndonjë presion dhe me dëshirën e mësimdhënësve. Por, kryesorja ka qenë insistimi i prindërve që sa më parë të fillohet mësimi”, deklaroi drejtori Marjan Doda.

Nxënësit shprehën mjaft të lumtur pas këtij vendimi për t’iu kthyer bankave shkollore.

“Po ndihemi shumë mirë me këtë vendim, pasi që ne si klasë e IX e kemi edhe testin e arritshmërisë. Kemi mbetur mbrapa edhe me njësitë mësimore. Falënderojmë shumë stafin e shkollës që ka filluar me mësim”, shprehet nxënësja Leona Tafa.

Por jo të gjithë mësimdhënësit u janë përgjigjur kërkesës së prindërve. Kryetari i sindikatës së kësaj shkolle ka thënë se greva po përkrahet nga shumica e mësimdhënësve të kësaj shkolle.

“Unë përfaqësoj shumicën e kolektivit së kësaj shkolle. Shumica e mësimdhënësve përkrahin vazhdimin e grevës. Dy arsimtarë kanë filluar mësimin. Njëri ka mbajtur orët e veta, ndërsa tjetri ka zëvendësuar orët e kolegëve të pranishëm”, deklaron përfaqësuesi i SBASHK-ut për Gjakovën./Telegrafi/