Fillon edicioni i katërt i Garës së Robotikës – Kosova Makers League Open për shkollat fillore

KOSOVA MAKERS LEAGUE ka hapur aplikiminin për regjistrimin e shkollave fillore dhe institucioneve të tjera edukative në garën më të madhe edukative të robotikës për vitin shkollor akademik 2021/22.

Ftohen të gjitha shkollat fillore publike, private, OJQ-të, bibliotekat dhe qendrat e tjera edukative nga e gjithë Kosova, të cilat punojnë me fëmijët e grupmoshës 6-15 vjeç të bëhen pjesë e garës duke krijuar ekipet e tyre prej pesë (5) anëtarëve (1 mentor/e dhe 4 nxënës/e) dhe duke mbushur aplikacionin që mund ta gjejnë në faqen zyrtare www.kosovamakers.net, linku: https://bit.ly/3zn2M7e_deri më 22 tetor 2021.

Duke marrë pjesë në garë, secili ekip do të pajiset me robotë edukativ, të cilët ofrojnë qasje shumë të thjeshtë në botën e robotikës, por mundësojnë përdorim edhe më të avancuar.

Qëllimi kryesor i garës është që të krijohet një mjedis pozitiv dhe i shëndetshëm në mënyrë që fëmijët të rrisin interesimin e tyre në fushat e STEAM (Shkencë, Teknologji, Inxhinieri, Art dhe Matematikë), të zhvillojnë shkathtësitë e buta, të menduarit kritik dhe të fitojnë aftësi për zgjidhjen e problemeve në mënyrë kreative.

Gjatë gjithë vitit akademik shkollor, gara do të zhvillohet në katër raunde rreth temës “EKSPLORONI BOTËN UJORE” ku fëmijët do të zgjidhin “misione të ndërlikuara” me ndihmën e robotëve të tyre.

Dy ekipet fituese të Garës së Robotikës – KOSOVA MAKERS LEAGUE OPEN do të fitojnë mundësinë për të qenë pjesë e një vizite studimore në Zagreb, Kroaci ku do të kenë rastin të njoftohen me partnerët tanë IRIM-Croatian Makers të cilët janë ndër organizatorët më të mëdhenjë të garave të robotikës në Europë. Gjatë kësaj vitize, fëmijët do të kenë mundësinë të njoftohen me moshatarët e tyre të cilët i bashkon pasioni ndaj teknologjisë, të zhvillojnë aktivitete bashkërisht dhe të shkëmbejnë eksperiencat e tyre.

Për t`u informuar më shumë rreth garës, organizimit të saj dhe kritereve të aplikimit, klikoni këtu: https://bit.ly/2VKrh0o apo vizitoni faqën zyrtare www.kosovamakers.net

Gara e Robotikës (KML Open) implementohet nga Fondacioni BONEVET dhe këtë vit mbështetet nga Raiffeisen Bank.