Fillojnë përgatitjet për marrëveshjen e sigurimeve shoqërore me Slloveninë

Ministri i Financave, Punës dhe Transfereve, Hekuran Murati, mirëpriti sot zëvendëskryeministrin dhe Ministrin e Punës, Familjes, Çështjeve Sociale dhe Mundësive të Barabarta të Sllovenisë, Luka Mesec, në një takim ku u diskutua thellimi i bashkëpunimit ndërmjet dy vendeve.

Gjatë këtij takimi, të dyja palët u pajtuan që të iniciohet një marrëveshje për sigurime shoqërore mes Kosovës dhe Sllovenisë.

“Palët u pajtuan që të iniciohet marrëveshja për sigurime shoqërore mes dy vendeve, në mënyrë që të lehtësohet barra e qytetarëve tanë që jetojnë në Slloveni, si dhe anasjelltas, duke u mundësuar atyre të realizojnë të drejtën për pension në vendin ku jetojnë. Inicimi i kësaj marrëveshjeje u konsiderua si interes i përbashkët i të dyja vendeve, andaj takimi i sotëm hapi rrugë për fillimin e negociatave ndërmjet ekipeve teknike drejt finalizimit të marrëveshjes”, thuhet në njoftim.

Në takim u diskutuan gjithashtu mundësitë për bashkëpunim në fushën e punësimit dhe zhvillimin e programeve të përbashkëta.

Palët shprehën vullnetin e tyre për të thelluar bashkëpunimin mes dy shteteve përmes nismave konkrete në dobi të qytetarëve të të dyja vendeve. /Telegrafi/