Fillimi i vitit shkollor do të varet nga gjendja epidemiologjike në Maqedoni

Ministri i Shëndetësisë Venko Filipçe sot theksoi se tani është shumë herët të tregohet nëse do të ketë anulim të fillimit të vitit shkollor. Fillimi i vitit shkollor, siç tha, do të varet nga shumë faktorë, ndërsa më së shumti nga gjendja epidemiologjike, e përgjithshme në vend.

“Në çdo rast ajo që është më e rëndësishme është se intensivisht bëhet vaksinimi i mësimdhënësve dhe se janë të gatshëm të gjithë skenarët për fillim të vitit shkollor”, deklaroi Filipçe pas vizitës së Klinikës Universitare për Gjinekologji dhe Akusheri (KSHA) në Shkup.

Duke u përgjigjur në pyetjen e gazetarëve, Filipçe tha se ende është në rrjedhë vaksinimi i mësimdhënësve dhe se pritet të përfundojë ai proces. Paralajmëroi se pastaj do të dalin me përqindje konkrete.

“Tani po vaksinohen edhe mësimdhënësit të cilët duhet të fillojnë me prani fizike, nëse gjithçka shkon mirë dhe është stabile, ndërsa tani kanë mbajtur mësim online. Ai proces do të përfundojë këtë javë dhe tjetrën, pastaj do ta dimë përqindjen e saktë”, theksoi Filipçe.