Fëmijët që shpëtuan nga aksidenti në Podujevë, janë jashtë rrezikut për jetë

Dy fëmijët që shpëtuan nga aksidenti i rëndë që ndodhi sot në rrugën Prishtinë-Podujevë, janë jashtë rrezikut për jetë. Të njëjtit janë duke u trajtuar në Qendrën Klinike Universitare të Kosovës (QKUK).

Familja katër anëtarëshe nga Malisheva u aksidentua mëngjesin e sotëm në rrugën Prishtinë – Podujevë derisa ishin duke ardhur nga Sllovenia për pushime në Kosovë. Si pasojë e aksidentit, lëndime të rënda pësuan dy prindërit e fëmijëve 36 dhe 35-vjeç, të cilët nuk arritën të iu bënin ballë plagëve dhe të njëjtit ndërruan jetë.

Lexo po ashtu Aksident i rëndë në rrugën Prishtinë-Podujevë, dy të vdekur dhe dy të lënduar

Kështu bëri të ditur në një prononcim për Telegrafin, nënkryetari i Komunës së Malishevës, Vesel Krasniqi.

“Kryetari i komunës së bashku me drejtorin e shëndetësisë sot i kanë vizituar fëmijët në QKUK, të cilët konsiderohen janë jashtë rrezikut për jetë”.

“Janë duke vazhduar trajtimin, ndërsa prindërit e tyre fatkeqësisht kanë humbur jetën. Kanë qenë duke ardhur nga Sllovenia në Kosovë”, deklaroi Krasniqi.

Ngjarjen e rëndë e ka konfirmuar për Telegrafin edhe Flora Ahmeti – zëdhënëse e Policisë së Kosovës për Rajonin e Prishtinës.

“Rreth orës 04:40 kemi pranuar informatën se në rrugën Prishtinë – Podujevë, ka ndodhur një aksident trafiku me pasoja fatale. Në këtë aksident kanë qenë të përfshira, një veturë (me targa të huaja) e cila ka qenë në lëvizje dhe një autobus”, ka thënë ajo.

“Si pasojë e aksidentit lëndime të rënda trupore kanë pësuar katër persona, dy prej tyre nuk kanë arritur të përballojnë plagët dhe të njëjtit kanë ndërruar jetë”.

Vdekjen e tyre e ka konstatuar ekipi mjekësor në vendngjarje.

“Trupat e  viktimave  Sh.S, mashkull, 36 vjeç dhe M.S, femër,  35 vjeç janë dërguar për obduksion në Institutin e Mjekësisë Ligjore, ndërsa dy personat tjerë të lënduar (fëmijë) janë dërguar për tretman mjekësor”, ka shtuar Ahmeti. /Telegrafi/