Kaq shumë jetë në Gaza janë ende në dyshim.
Në reparte të ndryshme të Spitalit Nasser shtrihen dy djem 10-vjeçarë, njëri i qëlluar nga zjarri izraelit dhe i paralizuar nga qafa e poshtë, ndërsa një tjetër me një tumor në tru.
Tani që është në fuqi një armëpushim i brishtë, ata janë midis rreth 15,000 pacientëve për të cilët Organizata Botërore e Shëndetësisë (OBSH) thotë se kanë nevojë për evakuime urgjente mjekësore.
Amar Abu Said është i paralizuar nga qafa dhe ka nevojë për trajtim të specializuar.
Familja e tij thotë se ai ishte në tendën e tyre në jug të Gazës kur u godit nga një plumb i humbur i qëlluar nga një dron izraelit. Plumbi është bllokuar midis dy vertebrave të tij, duke e lënë të paralizuar.
"Ai ka nevojë urgjente për ndërhyrje kirurgjikale, por është e komplikuar. Mjekët na thanë se kjo mund të shkaktojë vdekjen e tij, një goditje në tru ose hemorragji në tru. Ai ka nevojë për ndërhyrje kirurgjikale në një vend të mirë."
Aktualisht, Gaza është gjithçka tjetër përveç kësaj.
Pas dy vitesh lufte, spitalet e saj janë lënë në një gjendje kritike.
Në nkë tjetër repart rri Ahmed al-Jadd, shtrirë në një shtrat.
E ulur pranë shtratit të vëllait të saj më të vogël, motra e tij Shahd thotë se vëllai i saj ishte një ngushëllim i vazhdueshëm për të gjatë dy viteve të luftës.
"Ai është vetëm 10 vjeç dhe, kur situata jonë u përkeqësua aq shumë, ai dilte dhe shiste ujë për të na ndihmuar të siguronim para", tha ajo.
Disa muaj më parë, ai tregoi shenjat e para të shëndetit të dobët.
"Goja e Ahmedit filloi të varej në njërën anë", shpjegon Shahdi.
"Një herë ai vazhdonte të më thoshte, 'Shahd, më dhemb koka', dhe ne i dhamë vetëm paracetamol, por më vonë, dora e tij e djathtë ndaloi së lëvizuri."
Studentja e dikurshme e universitetit mezi pret që vëllai i saj të udhëtojë jashtë vendit për t'i hequr tumorin.
"Nuk mund ta humbasim. Ne tashmë e humbëm babanë tonë, shtëpinë tonë dhe ëndrrat tona", shtoi Shahdi.
"Kur ndodhi armëpushimi, na dha njëfarë shprese se ndoshta kishte një shans prej 1% që Ahmedi të mund të udhëtonte dhe të merrte trajtim."
Bëhet e ditur se agjencitë ndërkombëtare janë të dëshpëruara për të rritur numrin e evakuimeve.
Të mërkurën, OBSH-ja koordinoi konvojin e parë mjekësor për t'u larguar nga Gaza që nga fillimi i armëpushimit të brishtë më 10 tetor.
Ai transportoi 41 pacientë dhe 145 kujdestarë në spitale jashtë vendit nëpërmjet pikës kufitare Kerem Shalom të Izraelit, me ambulanca dhe autobusë që e çuan grupin në Jordani.
Disa kanë qëndruar për kujdes atje.
Agjencia e OKB-së ka bërë thirrje që numri i evakuimeve mjekësore të rritet me shpejtësi për t'u marrë me mijëra raste të të sëmurëve dhe të plagosurve.
Ajo dëshiron të jetë në gjendje të nxjerrë pacientët përmes pikës kufitare Rafah të Gazës me Egjiptin, siç ka bërë më parë.
Megjithatë, Izraeli ka thënë se do ta mbajë të mbyllur kalimin kufitar derisa Hamasi të "përmbushë" angazhimet e tij sipas kushteve të marrëveshjes së armëpushimit në Gaza duke kthyer trupat e pengjeve të vdekura.
Raportohet se Izraeli e ka mbajtur të mbyllur anën e Gazës të kufirit me Egjiptin që nga maji i vitit 2024, kur mori kontrollin gjatë luftës.
Duke folur në një konferencë për shtyp të enjten, kreu i OBSH-së, Dr. Tedros Adhanom Ghebreyesus, tha se "masa më me ndikim" do të ishte nëse Izraeli mund të lejonte që pacientët nga Gaza të trajtoheshin në Bregun Perëndimor të pushtuar, përfshirë Jerusalemin Lindor, siç ndodhi para luftës.
Zyrtarë të lartë të BE-së dhe ministrat e jashtëm të më shumë se 20 vendeve - përfshirë Mbretërinë e Bashkuar - kanë bërë thirrje më parë për këtë, duke ofruar "kontribute financiare, sigurimin e stafit mjekësor ose pajisjeve të nevojshme".
Ndryshe, në një tjetër zonë të Gazës u mbajt një funeral për tetëvjeçarin Saadi Abu Taha, i cili vdiq këtë javë nga kanceri në stomak.
"Qindra pacientë mund të trajtohen lehtësisht dhe me efikasitet brenda një kohe të shkurtër nëse kjo rrugë do të rihapej për në Rrjetin Spitalor të Jerusalemit Lindor dhe spitalet në Bregun Perëndimor", tha Dr. Fadi Atrash, Drejtor Ekzekutiv i Spitalit Augusta Victoria në Jerusalem.
"Ne mund të trajtojmë të paktën 50 pacientë në ditë për kimioterapi dhe rrezatim dhe madje edhe më shumë se kaq. Spitalet e tjera mund të bëjnë shumë ndërhyrje kirurgjikale", shtoi mjeku.
"Referimi i tyre në Jerusalemin Lindor është distanca më e shkurtër, mënyra më efikase, sepse ne kemi mekanizmin. Ne flasim të njëjtën gjuhë, kemi të njëjtën kulturë, në shumë raste kemi dosje mjekësore për pacientët nga Gaza. Ata kanë marrë trajtim në spitalet e Jerusalemit Lindor për më shumë se një dekadë para luftës."
BBC e pyeti Cogat, organin mbrojtës izraelit që kontrollon kalimet kufitare në Gaza, pse rruga mjekësore nuk po miratohej.
Cogat tha se ishte një vendim politik dhe ia referoi pyetjet zyrës së kryeministrit, e cila nuk ofroi shpjegime të mëtejshme.
Pas sulmeve të udhëhequra nga Hamasi më 7 tetor 2023, Izraeli përmendi arsye sigurie për moslejimin e pacientëve nga Gaza në territore të tjera palestineze.
Gjithashtu theksoi se pika e saj kryesore e kalimit për njerëzit në Erez ishte shënjestruar nga luftëtarët e Hamasit gjatë sulmit.
Ministria e shëndetësisë e drejtuar nga Hamasi në Gaza ka deklaruar se gjatë vitit deri në gusht 2025, të paktën 740 persona, përfshirë gati 140 fëmijë, vdiqën ndërsa ishin në listat e pritjes.
Në spitalin Nasser, drejtori i pediatrisë dhe maternitetit, Dr. Ahmed al-Farra, shprehu zhgënjimin e tij.
"Është ndjesia më e vështirë për një mjek të jetë i pranishëm, i aftë të diagnostikojë një gjendje, por i paaftë të kryejë testet thelbësore dhe pa trajtimet e nevojshme."
"Kjo ka ndodhur në kaq shumë raste dhe, për fat të keq, ka humbje të përditshme jetësh për shkak të mungesës së aftësive tona."
Që nga armëpushimi, shpresa është shuar për më shumë nga pacientët e tij.
Javën e kaluar, Tafesh, tre vjeç, dhe Luay Dweik, tetë vjeç, vdiqën nga hepatiti.
Pa veprime, ka shumë më tepër banorë të Gazës që nuk do të kenë një shans për të jetuar në paqe. /Telegrafi/
