Federata malazeze shkarkon Tumbakovicin: Ishte një befasi e pakëndshme dhe shkelje e detyrimeve profesionale

Ljubisa Tumbakovic është shkarkuar nga posti i trajnerit të Malit të Zi, pasi refuzoi ta drejtonte skuadrën në ndeshjen kundër Kosovës.

“Bordi ekzekutiv i Federatës së Futbollit të Malit të Zi ka mbajtur sonte (e enjte) një seancë të jashtëzakonshme të nxitur nga ndodhitë rreth përfaqësueses para raundit të tretë kualifikues për ‘Euro 2020’ kundër reprezentacionit të Kosovës”.

Lexo po ashtu Të gjitha lajmet nga Përfaqësuesja e Kosovës

“Anëtarët e bordit ekzekutiv kanë marrë vendim unanim për heqjen e përzgjedhësit të deritanishëm të ekipit kombëtar, Ljubisa Tumbakovic, për shkak të vendimit për të mos e udhëhequr ekipin në ndeshjen e përmendur, gjë që paraqet një befasi të pakëndshme dhe shkelje të detyrimeve profesionale të përcaktuara me marrëveshje”.

“Njëherësh, bordi ekzekutiv ka vendosur që ekipin kombëtar në ndeshjen kundër Çekisë ta drejtojnë nga banka dyshja Miodrag Dzudovic dhe Dragoje Lekovic”.

“Anëtarët e bordit ekzekutiv kanë shprehur keqardhje të madhe që presionet nga qarqet e ndryshme kanë bërë që në këtë ndeshje të rëndësishme për ekipin kombëtar të mos paraqiten Filip Stojkovic dhe Mirko Ivanic, dhe për faktin që gjërat josportive në këtë rast fituan ndaj futbollit dhe sportit”, thuhet në komunikatën e lëshuar nga Federata malazeze. /Telegrafi/