Faton Bislimi për vizitat e fundit nga CIA e NATO: Kosova “e vogël” ka rëndësi të madhe gjeopolitike në zhvillimet ndërkombëtare

Ish-deputeti i LDK-së, Faton Bislimi, i cili aktualisht jeton dhe vepron në Shtetet e Bashkuara të Amerikës, ka dhënë një intervistë për emisionin “Përballje” në Telegrafi.com me kryeredaktorin Muhamet Hajrullahu, ku diskutoi mbi zhvillimet e fundit gjeopolitike në Kosovë dhe rajon.

Bislimi theksoi rëndësinë e këtyre vizitave duke i cilësuar si të jashtëzakonshme për Kosovën, sidomos në kontekstin e tensioneve globale midis perëndimit dhe lindjes, me Rusinë dhe Serbinë në qendër të vëmendjes.

“Vizitat në fjalë kanë vlerë jashtëzakonisht të madhe për Kosovën, sepse në qoftë se ka një vend ku mund të ndizet një konflikt i ri, si kërkesë dhe si synim i Rusisë, për ta shpërqendruar vëmendjen perëndimore nga konflikti me Ukrainën është Ballkani”, deklaroi Bislimi.

Ai vuri në dukje se Kosova, për shkak të marrëdhënieve të tensionuara me Serbinë dhe sfidave të vazhdueshme në veri të vendit, është një vend potencial për shpërthimin e një konflikti të ri, i cili mund të përdoret nga Rusia për të shpërqendruar vëmendjen nga lufta në Ukrainë.

Në vazhdim, Bislimi nënvizoi rëndësinë strategjike të Kosovës në dinamikat globale, pavarësisht se vendi është i vogël në madhësi.

“Ne mund ta shohim veten si vend i vogël. Mund ta shohim veten si vend i parëndësishëm në ë në çështjet globale të marrëdhënieve ndërkombëtare mirëpo kemi vlerë të madhe në këtë dinamikë të zhvillimeve. Domethënë, ne mund të jemi një vogëlsirë, por jemi vogëlsirë vlerë madhe në zhvillimet dinamike me të cilat ballafaqohet perëndimi sot”, shtoi aktivisti nga SHBA.

Ai theksoi se Kosova ka një partneritet të gjatë dhe të besueshëm me Shtetet e Bashkuara të Amerikës, i cili është ndërtuar mbi baza të forta besimi.

Sipas tij, ky besim dhe partneritet e bëjnë Kosovën një aktor të rëndësishëm në zhvillimet gjeopolitike aktuale, veçanërisht duke pasur parasysh se Ballkani mbetet një rajon me potencial për konflikte të reja.

Bislimi shtoi se është thelbësore që Kosova, si shtet dhe si shoqëri, të jetë vigjilente dhe e përgatitur për të përballuar sfidat që mund të lindin në këtë kontekst kompleks ndërkombëtar./Telegrafi/