Falja e borxheve përfshinë edhe kompaninë e vëllait të Thaçit

Shteti i bashkëudhëhequr nga Hashim Thaçi ka vendosur që në listën e faljes së borxheve tatimore të përfshijë edhe kompaninë në pronësi të vëllait të tij, Idrizit.

Insajderi ka zbuluar se nga Ligji për Falje kanë përfituar biznese në pronësi të të njerëzve të afërt me politikanë të fuqishëm. Njëra prej tyre që ka qenë e parregullt në pagesën e obligimeve ndaj shtetit është edhe kompania “Geo Mineral” në pronësi të Idriz Thaçit, vëllait të Hashim Thaçit.

Kompania është e licencuar për shfrytëzimin e gurit gëlqeror që përdoret për zhavorr për asfaltimin e rrugëve. Kompania ka zyret në Prishtinë ndërsa gurëthyesi gjendet në fshatin Astrazub të Malishevës. Emri i kompanisë figuron në listën e Administratës Tatimore tek bizneset që kanë krijuar borxhe gjatë përiudhës 2009-2014.

Dokumenti i ATK-së tregon se ndaj kësaj kompanie ishte shqiptuar një ndëshkim prej 2 mijë e 697 euro. Kompania nuk e kishte paguar. Nga mospagesa është rritur vlera e Interesit deri në 1 mijë e 206 euro. Vlera totale e borxhit që ky biznes ka ndaj Administratës Tatimore është 3 mijë e 902 euro, raporton Insajderi.

Ligji për faljen e borxheve i hyrë në fuqi vitin e kaluar parasheh faljen e gjobave dhe të interesit për kompanitë që paguajnë borxhin e krijuar nga tatimi bazë. Tek pjesa “Tatimi bazë”, figuron se kompania ka zero euro borxhe. Pasi që kompania nuk detyrohet të paguajë borxh nga tatimi bazë, ligji jep mundësinë e shlyerjes së borxheve të krijuar nga gjobat dhe interesi.

Pronari të kompanisë, Idriz Thaçit, i janë dërguar pyetje nga Insajderi. Ende nuk ka dhënë përgjigje se pse nuk ka paguar gjobën e shqiptuar nga shteti.

Edhe Administrata Tatimore e Kosovës nuk ka dhënë përgjigje për Insajderin kur është pyetur se pse nuk ka arritur të inkasojë borxhin e firmës në pronësi të Idriz Thaçit. Insajderi ka pritur disa javë përgjigje nga Administrata Tatimore. Përveç borxhit të “Geo Mineral”, ky institucion është pyetur edhe për borxhin e kompanive tjera siç janë: Kosova Petrol në pronësi të Bedri Selmani dhe “Alumil-Ko”, ku është hisedar deputeti i pavarur Shaip Muja.

Të dy kanë qenë më herët këshilltarë të Hashim Thaçit. Selmani e ka këshilluar kur Thaçi udhëhiqte Qeverinë e përkohshme të Kosovës më 1999 ndërsa Muja gjatë viteve 2007-2009. Po ashtu Selmani e Muja kanë qenë deputet të Partisë Demokratike të Kosovës në kohën kur udhëhiqej nga Thaçi. Insajderi ka raportuar se shteti parasheh që të fal mijëra euro borxhe të kompanisë ku është hisedarë deputeti Shaip Muja dhe qindra mijëra kompanisë “Kosova Petrol” të Bedri Selmanit.

Ndërkaq “Geo Mineral”, përkundër që është gjobitur nga ATK-ja ka fituar më herët tender publik të Korporatës Energjetike të Kosovës. Kompania fitoi tre tenderë në kohën kur drejtor prokurimi në këtë ndërmarrje ishte Nijazi Thaçi, kushëri i Hashim Thaçit, presidentit të zgjedhur të Republikës së Kosovës. Ndërkohë, veç operimit si biznes që merret me tregti private, kompania “Geo Mineral” doli fitues edhe në tre tenderë publikë të Korporatës Energjetike të Kosovës (KEK).

“Geo Mineral”, u shpall fitues më 24 prill të vitit 2009 në tenderin e emërtuar “Furnizim me material guror”. Oferta e kompanisë peshonte 205 mijë euro. Tenderin e ngjashëm e fitoi edhe më 21 prill të vitit 2011. Në tenderin e dytë oferta e kompanisë peshonte 156 mijë euro.

Por tenderin në vlerë më të madhe e fitoi më 7 dhjetor të vitit 2009. Tenderi peshonte 1 milionë e 298 mijë euro dhe ishte emërtuar “Ndërtimi i linjës së re të gypit për furnizim me ujë të rëndomtë për Termocentralin “Kosova B” nga kanali Ibër-Lepenc”. Kompania “Geo Mineral”, po ashtu ka qenë nënkontraktorë i konzorciumit Bechtel-Enka që ka ndërtuar autostradën “Ibrahim Rugova”. /Insajderi/Telegrafi/