Faktet që demantojnë udhëheqjen komunale të Kaçanikut: Shkolla Profesionale në kushte joprofesionale (Video)

Publikimi i pamjeve të Shkollës Profesionale “Feriz Guri – Vëllezërit Çaka” të Kaçanikut, në debatin për zgjedhjet lokale “Debat Pernime“, ka ngjallur reagimin e kryetarit Besim Ilazi dhe të Drejtorisë së Arsimit të kësaj Komune.

Në një bisedë përmes telefonit me KALLXO.com, Ilazi tha se gjendja e shkollës e shpërfaqur në “Debat Pernime” nuk është e mandatit të tij. Sipas tij, fotoja me dërrasën e zezë të dëmtuar është e vitit 2012.

Por, kjo mohohet nga mësimdhënësi i shkollës, Basri Kodra, i cili ka thënë se fotot e infrastrukturës shkollore ku shihen tabelat e dëmtuara dhe dritat e varura janë të vitit 2017.

“Kam bërë foto të klasave pa dyer, të xhamave të thyer, të bankave të çrregulluara dhe të prishura. Kam bërë foto të tabelave që ishin tejet të shkatërruara. Disa nga këto foto edhe i kam publikuar”, tha Kodra.

Sipas tij, fotoja e tabelës dhe dritës së rënë në Shkollën Profesionale, janë bërë në vitin 2017, pikërisht gjatë këtij mandati të udhëheqjes komunale.

Për të parë nga afër problemet e kësaj shkolle, ekipi i KALLXO.com ka vizituar shkollën me ç’rast ka biseduar me ushtruesin e detyrës së drejtorit, Zekrija Baftiu. Ai tha se qëkur ka marrë këtë pozitë, para një muaji, nuk ka pasur dëmtime të tabelave!

“Ato tabela kanë qëndruar diku -4 muaj dhe janë eliminuar për shkak se kanë qenë material i dobët, kanë qenë letër, dhe me lagien me shpuzë e kanë humbur formën e vet dhe janë dëmtuar”, tha ai.

Baftiu tregoi se shkolla është e vjetër dhe se shpeshherë bien tabelat nga muret e dobëta. Po ashtu, shkolla ka probleme me hapësirë për mësimnxënie dhe ka mungesë të sallës së edukatës fizike e cila për momentin është e improvizuar.

“Nga 34 paralele kemi 13 klasë dhe mësimi zhvillohet në dy ndërrime. Gjatë kësaj kohe kemi edhe klasë lëvizëse për shkak të mungesës së hapësirës”, deklaroi ai. /kallxo/