Presidenti i SHBA-së, Donald Trump, ka përmendur mundësinë që homologu i tij rus, Vladimir Putin, të pushtojë vende të tjera pas pushtimit të plotë të Ukrainës, gjatë një konference për shtyp në samitin e NATO-s në Hagë të mërkurën.
Trump u pyet nëse e konsideronte Putinin armik dhe nëse besonte se udhëheqësi rus kishte ambicie territoriale përtej Ukrainës.
"Është e mundur", u përgjigj Trump, shkruan Euronews, përcjell Telegrafi.
Trump tha gjithashtu se Putin e telefonoi për t'i ofruar ndihmë në zgjidhjen e konfliktit të fundit në Lindjen e Mesme dhe për të vepruar si ndërmjetës midis SHBA-së, Izraelit dhe Iranit.
"Ai telefonoi ditën tjetër (dhe) tha: 'A mund t'ju ndihmoj me Iranin?'. Unë i thashë jo, ju mund të më ndihmoni me Rusinë", tha Trump.
Presidenti i SHBA-së ka treguar më parë se është në kontakt të rregullt me Putinin, veçanërisht për Ukrainën.
Kujtojmë se përpara mandatit të tij të dytë në Shtëpinë e Bardhë, Trump njoftoi se do të negocionte një fund të pushtimit rus të Ukrainës brenda 24 orësh, por u tha gazetarëve në samitin e NATO-s se po bënte sarkazëm.
Ai tha se negociatat janë "më të vështira nga sa kishte menduar kushdo" dhe se "Putini është më i vështirë".
Trump tha gjithashtu se pati një takim "të mirë" me presidentin ukrainas Volodymyr Zelensky në margjinat e samitit.
Trump shtoi se do të "shihte" nëse SHBA-të mund ta furnizonin Ukrainën me sisteme mbrojtëse ajrore Patriot në të ardhmen.
Ndryshe, të 32 aleatët e NATO-s ranë dakord të rrisin shpenzimet për mbrojtjen në 5% të PBB-së brenda 10 viteve në samitin dy-ditor në Hagë.
Dhe Trump tha se kjo ishte një “fitore e madhe” për SHBA-në dhe Perëndimin. /Telegrafi/
