Elon Musk thotë se dëshiron që Twitteri të mundësojë video-thirrje, telefonata si dhe mesazhe të ‘inkriptuara’

Elon Musk iu tha të hënën punëtorëve të Twitter se dëshiron të shtojë veçoritë e video-thirrjeve dhe telefonatave, dhe të ofrojë siguri te mesazhet e drejtpërdrejta në platformën e mediave sociale, sipas një regjistrimi të rrjedhur të siguruar nga The Verge.

Në selinë qendrore të kompanisë në San Francisko, Musk bëri një prezantim me sllajde me titull “Twitter 2.0”. Ai e përdori për herë të parë termin të mërkurën e kaluar, pasi i dërgoi stafit një ultimatum për të punuar “me orar të zgjatur” ose do të “pushohen nga puna”.

Regjistrimi i siguruar nga The Verge zbulon disa nga planet e Musk për të përditësuar Twitterin, duke përfshirë komunikimin e sigurt. Sipas planeve, DM-të do të jenë të inkriptuara, që do të thotë se teksti mund të lexohet vetëm nga pjesëmarrësit, siç është rasti në platformat si WhatsApp, Telegram dhe Signal.

Musk shtoi se ai kishte folur me krijuesin e Signal, Moxie Marlinspike, një ish-punonjëse e Twitter-it, e cila është “potencialisht e gatshme të ndihmojë” me kodimin e DM-ve në Twitter.

“Ne duam t’u mundësojmë përdoruesve të komunikojnë pa u shqetësuar për privatësinë e tyre”, tha Musk, duke përmendur shkeljet e mundshme të të dhënave që mund të rrjedhin mesazhe, ose punonjësit që spiunojnë përdoruesit.

Në gusht, një ish-punonjës u shpall fajtor për spiunazh, pasi i kaloi informacionet e përdoruesve të Twitter në Arabinë Saudite, ish-punonjësi ishte paguar mbi 300,000 dollarë për ta bërë këtë.

“Ideja duhet të jetë që unë nuk do të mund të lexoja DM-të e askujt edhe nëse dikush ma drejton armën”.

Ai gjithashtu shtoi se donte të lejonte telefonatat dhe video-thirrjet përmes DM-ve, një veçori tashmë e disponueshme në Facebook dhe WhatsApp.

Musk shpjegoi se si Twitter mund të lejonte thirrje të sigurta pa pasur nevojë të jepni numrin tuaj të telefonit, gjë që është rasti me Signal.

Zëvendësimi i numrave të telefonit me emra përdoruesish të llogarive më të identifikueshme është një ide e njohur në qarqet e teknologjisë. Musk javën e kaluar i bëri jehonë mbështetjes së themeluesit të Twitter, Jack Dorsey për një koncept të tillë.

Është e paqartë nëse thirrjet dhe mesazhet e koduara do të jenë të disponueshme për të gjithë përdoruesit, ose vetëm si pjesë e abonimit në Twitter Blue prej 8 dollarësh në muaj. /Telegrafi/