Ekspertët italianë: Pa asnjë dyshim, vaksina do të jetë efektive edhe ndaj variantit të ri të coronavirusit

Ekspertët kryesorë italianë kanë thënë të hënën se vaksina për COVID-19 do të jetë akoma efektive pasi u zbulua një variant i ri, më infektiv i coronavirusit në Mbretërinë e Bashkuar.

“Kanë qenë tashmë variante në të kaluarën e afërt dhe mund të ketë të tjerë në të ardhmen”, ka thënë Francesco Vaia, drejtori shëndetësor në spitalin e sëmundjeve infektive Spallanzani të Romës, përcjell Telegrafi.

“… kjo nuk do të thotë që sëmundja është bërë më e keqe ose më vdekjeprurëse. Vaksina nuk është vënë në dyshim”.

Edhe Franco Locatelli, presidenti i Institutit të Lartë të Shëndetit të Italisë (ISS), tha gjithashtu të hënën se mutacioni i virusit nuk duhet të ndikojë në efektivitetin e vaksinës kundër COVID-19.

Në këtë drejtim, shkruan ANSA, ekspertët në Spallanzani kanë filluar procedurën për të izoluar sekuencën e llojit të ri.

Analiza po bëhet në testet e kryera në një pasagjer i cili zbarkoi në aeroportin Fiumicino të Romës në një fluturim nga Londra të dielën dhe i cili doli pozitiv për coronavirusin.

Burime pranë Komisionerit të Urgjencave për Coronavirus, Domenico Arcuri, kanë theksuar se shfaqja e llojit të ri nuk do të ndikojë as në planin e vaksinimit ndaj COVID-19 të Italisë.

Fushata pritet të fillojë javën e ardhshme pasi Agjencia Evropiane e Barnave (EMA) miratoi të hënën vaksinën Pfizer-BioNTech për COVID-19. /Telegrafi/