Ekipi Menaxhues i Asociacionit – pas Presidencës dhe Qeverisë, BE-së i reagon edhe Lëvizja Vetëvendosje

Një ditë më parë ka reaguar Presidenca dhe Qeveria e Kosovës lidhur me deklaratat e Bashkimit Evropian pas shkarkimit të Ekipit menaxhues për hartimin e draft-statutit të Asociacionit të komunave me shumicë serbe.

Pasi ditë më parë, Qeveria e Kosovës shkarkoi Ekipin menaxhues reagoi BE duke thënë se lirimi nga detyra i Ekipit Menaxhues për statutin e Asociacionit është në kundërshtim me marrëveshjen për dialogun.

Pas deklaratës së zëdhënësit të BE-së, Peter Stano të enjten kanë reaguar nga Presidenca dhe Qeveria, ndërkaq sot reagoi edhe shefja e Grupit parlamentar të Lëvizjes Vetëvendosje, Mimoza Kusari-Lila.

Ajo theksoi se deklarata e BE-së do të kishte pasur njëfarë besueshmërie nëse do të kishte kritikuar ekipin menaxhues për propozimin e draftit antikushtetues në kundërshtim me parimet e BE-së.

“Kjo deklaratë do të kishte pasur njëfarë besueshmërie, nëse BE-ja do të kishte kritikuar ekipin e MGMT për propozimin e draftit antikushtetues, në kundërshtim me parimet e konfirmuara nga BE. Është e detyrueshme për suksesin e procesit, që BE t’iu qëndroj pas parimeve të saj”, shkruan Kusari-Lila.

This statement would have had some credibility, if EU would’ve slamed the mgmt team for proposing anti constitutional draft, contrary to the principles EU confirmed. It’s mandatory for rhe success of process, EU sticks to its own principles! @EURACTIV https://t.co/c414lyIpSj

— Mimoza Kusari 🇽🇰🇺🇦 (@mimozakusari) May 5, 2023

Ndërkaq, të enjten Blerim Vela, shef i stafit të Presidentes Vjosa Osmani, pati një qasje më ndryshe ndaj zyrtarit të BE-së, Peter Stano, duke vënë në pikëpyetje gjykimin e tyre ndaj shkeljeve të mundshme që po bën njëra apo tjetra palë në dialog.

“Hej z. Stano”, iu drejtua Vela zëdhënësit të BE-së, “a do të dënoni edhe emërimet e organeve ilegale të përkohshme komunale në Kosovë nga qeveria e Serbisë? Kjo është një shkelje e qartë e të gjitha marrëveshjeve të Brukselit pasi Serbia duhet të shpërbëjë të gjitha strukturat e saj ilegale në Kosovë.”

“Apo, vetëm do merrni shënim edhe për këtë?”, shtoi Vela, duke marrë shkas deklaratën e Stanos se e kanë shënuar si vërejtje votën kundër të Serbisë për anëtarësimin e Kosovës në Këshillin e Evropës.

Po ashtu edhe Klisman Kadiu, këshilltar politik i zëvendëskryeministrit të parë të Kosovës, Besnik Bislimi i është kundërpërgjigjur deklaratës së zëdhënësit të Bashkimit Evropian se Kosova ka vepruar në kundërshtim me marrëveshjen për normalizimin e marrëdhënieve Kosovë-Serbi.

Kadiu në një postim në Facebook të enjten ka thënë se vendimi i Qeverisë së Kosovës për të liruar nga detyra Ekipin Menaxhues që ditë më parë prezantoi një draft për Asociacionin e komunave me shumicë serbe, nuk është në kundërshtim me marrëveshjen.

“Nga deklarata e zëdhënësit të BE-së, vihet re se ka minimum të njohurisë për atë që po zhvillohet në procesin e dialogut, por maksimum gatishmëri në nxjerrjen e deklaratave kundër Kosovës”, kishte shkruar Kadiu. /Telegrafi/