Edhe Vetëvendosje bën publik skandalin: Po bëhet vjedhje institucionale përmes njehsorëve të rrymës

Lëvizja Vetëvendosje nëpërmes një konferencë për medie ka thënë se është bërë vjedhje institucionale përmes njehsorëve të energjisë elektrike.

“Prej paslufte, në Kosovë është paraqitur problemi i mosfunksionimit të komutatorëve të tarifave ditë-natë. Në mungesë të përkujdesjes së personelit të Distribucionit, që t’i akordojnë mekanizmat kohorë dhe t’i riblombojnë komutatorët bashkë me njehsorët, sistemi u la i pavarur dhe i pasinkronizuar me kohën. Ky mos sinkronizim rezultoi me vendosjes e tarifës së natës në pik-maje të konsumit dhe me humbje të KEK-ut”, thuhet nga Vetëvendosje, transmeton Koha.net.

Lidhur me këto çështje u diskutua në konferencën e sotme të Lëvizjes Vetëvendosje, nga Naim Hoxha, drejtues i Komitetit për Energjetikë, i cili tha se në vend se të përcaktohen për sinkronizim ndërmjet njehsorit dhe komutatorit të tarifave, doli ideja për ndërrim të njehsorit.

“Natyrisht, motivi kryesor nuk kishte lidhje me rregullimin e kohës së veprimit të tarifave apo ngritjes së saktësisë, por ishte motiv korruptiv. Pajimet e blera ishin të cilësisë së dyshimtë dhe asgjë nuk përmirësua. U ndërruan njehsorët induktiv dhe sipas statistikës së dhënë nga ZRRE mbi gjysma e tyre ishin nën 20 vjeç, pajisje që edhe sot përdoren në të gjitha vendet e Ballkanit”, tha Hoxha.

Ai shtoi se pas një numri të vërejtjeve nga konsumatorët për defektet dhe gabimet e njehsorëve, MTI vendosi t’i ekzaminojë njehsorët KOHLER AEL.TF.04 në Holandë, dhe rezultatet e ekzaminimeve treguan se njehsorët kanë defekte.

“Më tej, vendimi për shfuqizimin e lejes për montimin dhe përdorimin e këtij tipi të njehsorëve, gjë që do të rezultonte me heqjen e menjëhershme të atyre njehsorëve dhe dërgimin e njehsorëve tjerë për ekzaminim. Fatkeqësisht nuk ndodhi as njëra e as tjetri. As sot kur po flasim, nuk janë hequr ata njehsorë. Qytetarët ende paguajnë faturë me çmim abuziv. Pra, kemi të bëjmë me vjedhje institucionale”, u shpreh Naim Hoxha.

Ndërsa, deputeti Besnik Bislimi tha se është e pakuptimtë se si një monopolist siç është KEK-u, të blejë ora të ndryshme, sepse çdo logjikë ekonomike do të mundohej që përmes sasisë ta ulte çmimin.

“Me blerjen e njehsorëve të njëjtë, edhe do të standardizohej procesi i matjes edhe do të sigurohej çmimi më i volitshëm i blerjes. Ideja për zëvendësimin e orëve ka filluar në vitet 2008-2009, kurse është realizuar pak para shitjes së distribucionit. Pra shteti, në një kompani që e shiti për 26 milionë euro, pak para shitjes bëri investime 10-12 milionë euro”, u tha Bislimi.

Pas vendimit të MTI-së lidhur me heqjen e licencës për këta njehsorë, e para reagoi prokuroria duke arrestuar 3 zyrtarë të Agjencisë së Metrologjisë së Kosovës, për mashtrim të blerësve.

“Ky mashtrim ka vazhduar që nga atëherë, dhe MTI nuk e ka parë të rrugës që të bëj presion tek KEDS për t’i ndryshuar ata njehsorë. Përveç kësaj, nuk ka reaguar as Zyra e Rregullatorit, e cila ka mundur të kërkojë që matësit të jenë kualitativ, e jo të mashtrojnë konsumatorin”, tha ndër të tjera Besnik Bislimi.

Sipas VV-së, ky dështim i të gjitha hallkave të sistemit shkon në kurriz të konsumatorit, për më tepër, personi kyç që ishte arrestuar, humbi jetën nga infarkti.

“Ky është një proces që me automatizëm ngjallë shumë dyshime. Pikënisje është brenga jonë për dëmtimin e qëllimshëm të qytetarëve nga neglizhenca e Qeverisë së Kosovës”, thuhet në fund nga VV.