E pazakontë – mblidhen 35 mijë dollarë donacione për vrasësin e CEO-s së UnitedHealthcare

Më shumë se 35 mijë dollarë janë mbledhur për Luigi Mangione, burrin e akuzuar për vrasjen e CEO-s së UnitedHealthcare, Brian Thompson, përmes një fushate online.

Pas të shtënave më 4 dhjetor që i morën jetën Thompsonit, donacionet kanë vërshuar me mesazhe që mbështesin Mangione dhe, në disa raste, lavdërojnë krimin.

Mangione, 26 vjeç, përballet me akuza për vrasje pasi qëlloi Thompsonin për vdekje jashtë një hoteli në Manhattan, New York përpara një konference të industrisë. Pavarësisht dënimit të gjerë të krimit, Mangione ka fituar mbështetje në disa qarqe online, duke u kthyer në një figurë kundërthënëse, shkruan newsweek.

Lexo po ashtu Publikohen pamjet, momenti i vrasjes së shefit të kompanisë më të madhe të sigurimeve shëndetësore në Amerikë

Mbështetja për të u intensifikua pas arrestimit gjatë ditës së hënë, me mbi njëmijë donatorë që kontribuuan në fushatën e GiveSendGo. Shumë prej donatorëve shprehën zemërim me sistemin e kujdesit shëndetësor në SHBA, duke kritikuar kompanitë e sigurimeve për mohimin e mbulimeve dhe duke nxitur zemërim për pabarazinë në rritje të të ardhurave.

Një donator e përshkroi vrasjen e Thompsonit si një “vrasje të justifikuar,” ndërsa të tjerë përmendën frazën “Refuzo, Përgënjeshtro, Mbrohu,” që raportohet të jetë gjetur në fishekët në vendin e ngjarjes, e që disa e konsiderojnë si reflektim të taktikave të përdorura nga siguruesit për të shmangur pagesat.

Gjithashtu, po shiten mallra me slogane si “Gjuetari i CEO-ve,” dhe fotografi “Të kërkuar” me fytyrat e drejtuesve ekzekutivë janë shfaqur në New York City.

Mangione aktualisht mbahet në Pennsylvania për akuza të lidhura me armë mbajtje pa leje dhe falsifikim, ndërsa prokurorët njujorkez po kërkojnë ekstradimin e tij. /Telegrafi/