“E pabesueshme, qesharake, absurde…”, reagimet ndaj deklaratës së Borrellit, se mezi pret të punojë me qeverinë e re të Serbisë

Përfaqësuesi i Lartë i Bashkimit Evropian për Politikë të Jashtme dhe Siguri, Joseph Borrell, ka uruar sot Millosh Vuçeviqin për zgjedhjen në postin e kryeministrit të Serbisë.

“Paraprakisht, mezi pres të punoj me ju, Ministrin e Punëve të Jashtme, Marko Gjuriq dhe anëtarët e tjerë të qeverisë, në mënyrë që Serbia të ecë përpara në rrugën e saj evropiane”, ka shkruar në rrjetet sociale diplomati evropian.

Kjo ka bërë që të reagojnë deputeti gjerman, Michael Roth si dhe ish-Ministri i Jashtëm malazez, Miodrag Vlahoviq, duke marrë parasysh se në qeverinë serbe gjenden dy ministra të sanksionuar nga SHBA-ja për korrupsion.

“Serbia dëshiron të bëhet anëtare e plotë e Bashkimit Evropian. E vërtetë. Por qeveria e re e Serbisë? Seriozisht?”, ka ironizuar Roth.

Serbia wants to become a full member of European Union. True. But the new Government of Serbia? Seriously? https://t.co/zQaE4reqL9

— Michael Roth – official 🇪🇺🇺🇦🇮🇱🇬🇪 (@MiRo_SPD) May 3, 2024

E pabesueshme, absurde dhe qesharake e ka cilësuar ish-zyrtari shtetëror malazez urimin e Borrellit.

“Ky është, në fakt, një shembull i përsosur i politikës krejtësisht të kotë dhe thellësisht të paaftë të burokratëve të BE-së ndaj Serbisë dhe Ballkanit Perëndimor. ‘Për ta çuar Serbinë përpara në rrugën e saj drejt BE-së’?! Është një kabinet LUFTE, pro-rus! E turpshme”, ka shkruar ish-kryediplomati malazez në platformën X.

Unbelievable, preposterous, ridiculous. @JosepBorrellF This is, actually, a perfect example of utterly futile & profoundly incompetent EU bureaucrats policy towards Serbia & the WB. “To move Serbia forward on its EU path”?!🤡 It’s a WAR cabinet, pro-Russian one! Shameful. https://t.co/SevCQS3eB2

— Miodrag Vlahovic🇲🇪 (@Mico_Vlahovic) May 3, 2024

Kujtojmë se Departamenti amerikan i Shtetit i ka vendosur sanksione kohë më parë Aleksandar Vulinit (zëvendëskryeministër) dhe Nenad Popoviqit (ministër pa portofol).

Nenad Popoviq është i sanksionuar nga SHBA-ja që nga nëntori i vitit 2023, ndërsa sanksionet ndaj Vulinit u vendosën në korrik të të njëjtit vit. Të dy janë në “listën e zezë”, ndër të tjera, për shkak të lidhjeve të tyre me Kremlinin.

Lexo po ashtu DASH i zhgënjyer me propozimet për qeverinë e re të Serbisë, Vuçiq thotë se atë "e zgjedhin qytetarët"

Departamenti amerikan i Shtetit deklaroi se SHBA-ja është “e zhgënjyer” nga propozimi i Vulinit dhe Popoviqit dhe shtoi se të dy mbeten nën sanksione, sepse qëndrimi i SHBA-së ndaj tyre është “i njohur mirë”. /Telegrafi/