E konfirmon presidenti i skuadrës turke: Kishim marrëveshje për huazimin e Dele Alli, Lampard prishi gjithçka

Dele Alli është bashkuar me Evertonin në minutat e fundit të afatit kalimtar dimëror.

Mesfushori anglez iu bashkua skuadrës nga Goodison Park si huazim nga Tottenham Hotspur me mundësi blerje.

Por Alli ka mundur të jetë tani pjesë e skuadrës turke Adana Demirspor së bashku me Mario Balotellin dhe portierin e Kosovës, Arijanet Muric.

Gjithçka ishte e kryer mes klubeve, ku Alli do t’i bashkohej Adanas si huazim deri në qershor. Këtë e ka konfirmuar presidenti i Adana Demirspor, Murat Sancak.

“Ne bëmë një marrëveshje me Tottenhamin për Dele Alli. Do të vinte në formë huazimi, edhe vëllai i tij i madh erdhi në Turqi dhe transferimi thuajse kishte përfunduar”, deklaroi Sancak.

Por zyrtarizimi i Frank Lampard si trajner i Everton ka prishur planet e skuadrës turke. Trajneri anglez e bindi mesfushorin që t’i bashkohet atij në Goodison Park.

“Por pikërisht atëherë kur po përgatiteshim për huazimin e Alli, Frank Lampard u bë trajner i ri i Evertonit dhe e bindi lojtarin t’i bashkohej atyre”, tha Sancak. /Telegrafi/