Dyshohet se shkeli embargon me Rusinë, bllokohen anija me 22,500 tonë naftë në Portin e Durrësit

Policia e Shtetit ka njoftuar sot bllokimin e një anije që transportonte 22,500 tonë naftë kontrabandë e ardhur nga Rusia në Portin e Durrësit.

Kujtojmë se që prej nëntorit të vitit të kaluar, Shqipëria ka ndaluar importimin e drejtpërdrejt, apo të tërthortë të naftës ruse.

Në njoftimin e policisë, bazuar në informacioneve të marra është organizuar dhe është në vijim operacioni policor i koduar “Embargo”, në kuadër të të cilit është bllokuar një anije me flamur liberian, e cila transportonte 22,500 tonë naftë, me dokumentacion të falsifikuar, që do të kontrabandohej në Shqipëri.

“Nga veprimet e para hetimore dyshohet se kjo ngarkesë nafte është marrë nga vendet me embargo për naftën, konkretisht nga Rusia”, sqaron policia, duke shtuar se anija ishte nisur nga Azerbajxhani dhe pretendohet se më pas është ngarkuar me naftë në portin Kallamata, Greqi, nga një anije tjetër, në një sasi prej 22,500 tonë lëndë djegëse naftë.

“Në vijim të veprimeve, bazuar në dyshime të arsyeshme se kjo sasi nafte e kishte origjinën nga vendet me embargo dhe ishte e kontrabanduar, pasi nuk disponohej dokumentacion i rregullt, u bë sekuestrimi i saj dhe i dokumentacionit të lundrimit të kapitenit, si dhe bllokimi i ekuipazhit që përbëhej nga 22 shtetas, për kryerjen e veprimeve të mëtejshme procedurale”, shton policia.

Grupi hetimor, nën drejtimin e Prokurorisë, po vijon hetimet e thelluara, me qëllim dokumentimin sa më të plotë të kësaj veprimtarie të kunndërligjshme dhe për identifikimin e shtetasve të përfshirë në këtë veprimtari, si persona fizikë apo juridikë. /Telegrafi/