Dyshohen dy shoferë të cilët morën pjesë në aksidentin ku humbi jetën një këmbësor në Shkup

Prokuroria Themelore Publike në Shkup ka lëshuar urdhër për kryerjen e hetimeve për aksidentin e trafikut që ka ndodhur para disa ditësh në lagjen “Butel” të Shkupit, në të cilën humbi jetën një këmbësor, një djalë i ri nga Shkupi, përcjell Telegrafi Maqedoni.

Prokurori publik kompetent, përveç masës arrest shtëpiak, të dyshuarit të parë i propozoi konfiskimin e përkohshëm të dokumentit të udhëtimit dhe patentën e shoferit.

Ndaj të dyshuarit të dytë janë propozuar masa përkujdesjeje, obligim që herë pas here të paraqitet te zyrtari i caktuar apo organi kompetent shtetëror, t’i konfiskohet përkohësisht dokumenti i udhëtimit dhe t’i caktohet ndalimi për dhënien e tij dhe heqja e përkohshme e patentë shoferit, gjegjësisht ndalim për lëshimin e tij.

PTHP njofton se më 31 korrik, i dyshuari i parë, shtetasi i RMV-së 41 vjeç, me banim në Itali, si pjesëmarrës në komunikacion në rrugë publike, nuk ka respektuar rregullat dhe me këtë ka rrezikuar qarkullimin publik, duke rrezikuar jetën e njerëzve.

“Ai nga korsia e majte në bulevardin “Sllovenija” në Shkup, në drejtim të nga perëndimi për në lindje, ka drejtuar automjetin “Mercedes” me targa të Italisë, por kur ka arritur te kryqëzimi “Brigada maqedono-kosovare” dhe “Bosnja dhe Hercegovina” në të cilën komunikacioni ka qenë i rregulluar me semaforë, ka vepruar kundër ligjit për siguri në rrugë dhe në vijë të plotë ka bërë tejkalim të një veture e cila ka qenë e ndaluar. Pasata ka vazhduar me lëvizjen dhe ka hyrë në rreth duke kaluar në semaforë të kuq”, thonë nga PTHP.

Sipas hetimeve, i dyshuari tjetër, një shtetas i RMV-së 39-vjeçar, ka qenë duke kaluar në kryqëzim me dritë të gjelbër, duke ruajtur drejtimin e lëvizjes, por pa e rregulluar shpejtësinë e lëvizjes.

Si pasojë, dy automjetet janë përplasur dhe vetura e drejtuar nga i dyshuari i dytë ka dalë nga rruga në vendin e ndarë për këmbësorë në anën veriperëndimore të kryqëzimit dhe ka goditur me anën e djathtë trupin e një këmbësori.

Si pasojë e goditjes, këmbësori i lënduar ka pësuar lëndime të rënda dhe është transportuar në Qendrën Urgjente në Kompleksin Klinikë “Nënë Tereza”, ku ka ndërruar jetë.

Lëndime të rënda ka pësuar edhe pasagjerja femër në veturën e të dyshuarit të dytë./Telegrafi/