Dy ish-pjesëtarët e UÇK-së flasin për takimin e parë me Adem Jasharin

Dy ish-pjesëtarët e Ushtrisë Çlirimtare të Kosovës, Ali Januzi dhe Abit Asllani, kanë folur për luftën e UÇK-së.

Ali Januzi ka thënë se takimin e parë me komandantin Adem Jashari e ka pasur në vitin 1995.

“Takimi i parë ishte më 1995 në muajin tetor. Për herë të parë ishte që u takuam me të, babanë e tij dhe Hamzën. Ne kishim dëgjuar për Ademin, për heroizmin e tyre dhe ne ishim të gatshëm të ju dalim në ndihmë edhe më herët, por nuk kishte organizim”, ka thënë Januzi në Debat Plus në RTV Dukagjini, përcjell Telegrafi.

Januzi ka thënë se para se të takohej me Adem Jasharin ai ishte takuar me Sami Lushtakun.

Ai ka shtuar më tej se si grup kanë shpërndarë pamflete që të vetëdijësojnë masën se Jugosllavia është duke rënë dhe se lufta një ditë do të ndodh.

Ndërkaq, Abit Asllani ka thënë se ngjarjet e vitit 1981 kanë qenë ato të cilat e kanë determinu plotësisht  rrjedhën politike edhe kombëtare të Kosovës.

“Është një vit i cili paraqet kthesë në kuptimin kombëtar. Në atë kohë shumë njerëz kanë provu që të organizohen në forma të ndryshme për të kryer aktivitete të natyrës kombëtare. Ka qenë vështirë t’i takojë një grupi siç janë quajtur ilegal. Ne kemi vepru në mënyrë konfidenciale.

Asllani ka treguar se kanë mbajtur takime të fshehta në Maqedoni, në vitin 1987, dhe se për ato takime ata kishin udhëtuar gjithë natën./Telegrafi/