Me dronë, helikopterë e policë nga terreni, zbulohen parcelat e kanabisit në Shqipëri

Policia shqiptare vijon operacionet anti-drogë në pjesë të ndryshme të Shqipërisë.

Së fundmi në një operacion në Gjirokastër, ku janë mobilizuar 95 policë në terren të përcjellë me dronë e helikopterë janë hasur parcela kanabisi.

Njoftimi i Ministrisë së Brendshme të Shqipërisë:

Vijon kontrolli masiv i territorit për parandalimin e kultivimit të bimëve narkotike.

Strukturat e Policisë po përdorin dronët për monitorimin e zonave të thella e pyjore.

Gjatë kontrollit të territorit janë angazhuar 95 punonjës policie dhe tre dronë.

Nga kontrollet me dronë nuk janë evidentuar raste të tentativës për kultivim të kanabisit.

Kontrollet janë alternuar nga ajri dhe toka.

Shërbimet policore që kontrolluan me këmbë, për disa orë, zonën e Këlcyrës, konstatuan një rast të tentativës për kultivim të kanabisit dhe vunë në pranga shtetasin G. E., 59 vjeç, pasi në fshatin Mërtinjë, Këlcyrë, në pronën e këtij shtetasi u gjetën të kultivuar disa fidanë narkotikë.

Gjithashtu, gjatë kontrollit në banesën e këtij shtetasi u gjetën dhe u sekuestruan dhe 330 fishekë luftarakë të kalibrit 7.62 mm.

Kontrolli i territorit do të vijojë pa ndërprerë, duke kontrolluar dhe në zonat më të largëta, falë përdorimit të flotës së dronëve dhe helikopterëve.