Drita e gjelbër e Bidenit mund të jetë tepër pak dhe shumë vonë për Ukrainën

Nga: Samuel Ramani / The Daily Telegraph
Përkthimi: Telegrafi.com

Më në fund ka përfunduar pritja e Ukrainës për të marrë leje për përdorimin e raketave amerikane ATACMS me rreze të gjatë veprimi në territorin rus. Presidenti Joe Biden ka miratuar përdorimin nga Ukraina të raketave ATACMS kundër objektivave në rajonin e Kurskut, ku forcat ruse dhe ato koreano-veriore po përpiqen të largojnë forcat ukrainase nga pozicionet e tyre të përforcuara.

Vendimi i Bidenit përfaqëson një triumf historik diplomatik për Ukrainën. Në Konferencën e Strategjisë Evropiane në Jaltë, më 13 shtator, presidenti ukrainas Volodymyr Zelensky argumentoi se dërgesat e raketave ATACMS ishin të padobishme nëse nuk mund të përdoreshin kundër objektivave ruse. Zelensky përdori këtë logjikë në një apel personal drejtuar Bidenit në Shtëpinë e Bardhë më vonë gjatë atij muaji, por u largua nga Uashingtoni duarbosh. Frika e kthimit të Donald Trumpit si president dhe kërcënimi i tij për të ndalur ndihmën amerikane për Ukrainën, e shtyu përfundimisht Bidenin drejt një veprimi vendimtar.

Përdorimi i raketave ATACMS nga Ukraina në Kursk pritet të sjellë përfitime të menjëhershme për pozicionin gjithnjë e më të vështirë të vijës së saj të frontit. Dërgimi nga Rusia i 10 mijë trupave koreano-veriore në rajonin e Kurskut, shihet gjerësisht si një hakmarrje asimetrike ndaj Ukrainës për marrjen e lejes për të përdorur armë të NATO-s kundër objektivave ruse. Sfida ndaj Rusisë, duke zgjeruar përdorimin e raketave ATACMS nga Ukraina, mund ta pengojë presidentin Vladimir Putin të rekrutojë kontingjente të tjera trupash koreano-veriore në vitin 2025. Kjo mund t’i lejojë gjithashtu Ukrainës të godasë më shpesh Aeroportin Vostoçni të Kurskut, një objekt ushtarak ku raportohet se ndodhen aeroplanët MiG-29 dhe sistemet e mbrojtjes ajrore Pantsir S-1.

Rëndësia e vërtetë e vendimit të Bidenit varet nga fleksibiliteti i ShBA-së për atë që do t’u ofrojë trupave ukrainase. Meqenëse Ukraina tashmë ka përdorur raketat me rreze më të shkurtër, HIMARS, në sulme përtej kufirit rreth Harkivit, ShBA-ja mund të miratojë përdorimin e raketave ATACMS për qëllime të ngjashme. Kjo do ta vështirësonte edhe më shumë përpjekjen e Rusisë për të arritur një përparim ushtarak në drejtim të Kupianskut.

Nuk është ende e qartë nëse ShBA-ja do ta lejojë Ukrainën të përdorë raketat ATACMS kundër objektivave ruse që ndodhen më larg vijave të frontit. Ndërkohë që Rusia ka zhvendosur paraprakisht 90 për qind të aeroplanëve që përdor për sulme me bomba rrëshqitëse jashtë rrezes së raketave ATACMS, 17 baza ajrore dhe të paktën 250 objekte ushtarake kryesore ndodhen ende brenda rrezes së tyre.

Nëse vendimi i Bidenit nxit kryeministrin britanik Keir Starmer të lehtësojë kufizimet mbi përdorimin e raketave Storm Shadow, këto objekte do të bëhen edhe më të ndjeshme. Sulmi i dyshuar me dron i Ukrainës mbi një fabrikë ruse në Izhevsk të dielën, e cila ndodhet një mijë e treqind kilometra larg kufirit të saj, ka ndërprerë zinxhirët e prodhimit të dronëve dhe mbrojtjes ajrore të Rusisë. Sigurimi i lejeve më të gjera për përdorimin e raketave ATACMS dhe Storm Shadow do të forcojë arritjet teknologjike të Ukrainës.

Ndërsa afrohet inaugurimi i Trump-it, ShBA-ja më në fund po mobilizohet plotësisht për të mbështetur fitoren e Ukrainës. Një kthesë premtuese, por që mund të jetë tepër pak dhe shumë vonë për Ukrainën. /Telegrafi/