Drejtori i Agjencisë për Parandalimin e Korrupsionit: MPJD ndër ministritë më të cenueshme ndaj korrupsionit

Yll Buleshkaj, drejtor i Agjencisë për Parandalimin e Korrupsionit (APK), tha se Ministria e Punëve të Jashtme dhe Diasporës (MPJD) është ndër ministritë më të cenueshme ndaj korrupsionit.

Sa i përket shqyrtimit të ligjeve në aspektin kundër korrupsion, ai tha se një vit më parë kanë zhvilluar metodologjinë, kurse më 2024 e kanë vënë në funksion për herë të parë metodologjinë e Këshillit të Evropës për hartëzimin e korrupsionit në institucionet publike.

“Ka qenë një punë mjaft e madhe që ka marrë më shumë sesa gjashtë muaj intensivisht, ndërsa tre muaj ka qenë përgatitor. E në korrik kemi prezantuar rezultatet para institucioneve të cilat kanë qenë pjesë e këtij vlerësimi. Ky vlerësim na ka ndihmu pastaj për t’u orientuar do të thotë shqyrtimin kundër korrupsion të legjislacionit”, tha Buleshkaj.

Sipas këtij vlerësimi, ai tha se rezultoi që disa ministri janë më të cenueshme, në mesin e tyre MPJD-ja.

“Një nga top institucionet që sipas këtij vlerësimi që është zhvillu nga Agjencia me metodologjinë më të avancuar të Këshillit të Evropës, na kanë rezultuar disa ministri të cilat janë më të cenueshme. Një nga to është Ministria e Punëve të Jashtme, ku ne pastaj kemi fillu legjislacionin e kësaj ministrie ta shyrtojmë. Jemi në fazën finale të disa ligjeve duke i shqyrtuar. Po besoj që në fillim të këtij viti do të kemi raportin të qasshëm për publikun. Ndërsa, është përfunduar drafti i parë nga stafi i Agjencisë”, tha Buleshkaj.

Ai tha se në këtë mënyrë po e testojnë se a po funksionon kjo metodologji në kontekstin e Kosovës. Sipas tij, institucionet që kanë rreziqe por nuk kanë masa, kanë dalë më keq në këtë vlerësim.

“Ky ka qenë një vit i suksesshëm. Ky hartëzim i korrupsionit na ka ndihmu neve për t’i orientuar edhe përpjekjet tona tek shqyrtimi i legjislacionit kundër korrupsion. Për shembull, vitin e ardhshëm të gjitha institucionet që nuk kanë dalë mirë në këtë proces të hartëzimit, do t’i ftojmë, do të takohemi me to dhe do të tentojmë t’i këshillojmë se cilat do të jenë hapat dhe masat të cilat do të duhej t’i ndërmerrnin ata për t’i zvogëluar rreziqet”, tha Buleshkaj.  /BetimipërDrejtësi/