Dosja Panama: Me gjashtë euro kompania Mossack Fonseca do të shpëtonte nga skandali!

Gjashtë euro e 13 centë do t’i kishin mjaftuar studios ligjore “Mossack Fonseca” për të shmangur rrjedhjen e 11.5 milionë dokumenteve të skandalit me përmasa botërore.

Kjo shumë do të ishte e mjaftueshme për të përditësuar funksionet e platformës “Wordpress”, me të cilën punonte studioja ligjore.

Vetë “Wordpress” ka kryer një analizë që e ka çuar në këtë përfundim.

Pas analizimit të të dhënave teknike, “Wordpress” ka kuptuar se kompania përdorte një version me defekt të aplikacionit “Revolution Slider”.

Dy vjet më parë, ky aplikacion ishte përditësuar, por “Mossack Fonseca” nuk kishte marrë versionin e ri. Kjo neglizhencë e vogël ka bërë që për muaj të tërë faqja e tyre të ishte një shënjestër e lehtë për çdo lloj virusi, i cili jepte akses në arkivin e plotë.

I tërë sistemi i komunikimit digjital pra ka qenë pa mbrojtje të mirëfilltë, shpjegojnë ekspertët. Marrjen e të dhënave e ka lehtësuar edhe fakti që serveri i postës elektronike dhe ai i faqes (www.mossfon.com) drejtoheshin nga i njëjti rrjet panamez (Cable Onda).

Më datë 4 prill, domeni është vënë nën mbikëqyrjen e kompanisë amerikane “Incapsula”, e specializuar në mbrojtjen nga sulmet kompjuterike, e cila në 6 prill e transferoi faqen në serverat e Lower Hutt, në Zelandën e Re. /Shekulli/