Dhjetëra fshatra të Lipjanit prej vitesh vazhdojnë të përballen me mungesë të ujit të pijshëm

Dhjetëra fshatra të Komunës së Lipjanit prej vitesh po vazhdojnë të përballen me mungesë të ujit të pijshëm. Kjo për shkak të mungesës së investimeve në zgjerimin e rrjetit të ujësjellësit dhe në mungesë të furnizimit. Një pjesë e fshatrave që nga paslufta e kanë të vendosur rrjetin e ujësjellësit, por atyre u mungon uji. E kjo po cilësohej nga opozita si neglizhencë e ekzekutivit të Komunës së Lipjanit.

Me gjendje më të rëndë po përballen banorët e fshatrave: Shalë, Janjevë, Zllakuqan, Ribari i Madh, Bregu i Zi, Grackë e Vogël, Resinoc, Baicë, Mirenë e të tjera.

Lumturije Bytyqi –Hasani, kuvendare nga radhët e PDK-së në Lipjan, në një intervistë me telegrafin ka thënë se mungesa e ujit të pijshëm është një ndër problemet më esenciale të qytetarëve të cilët ballafaqohen çdo ditë e që sipas saj,  fatkeqësisht Komuna nuk e ka as prioritet për të ardhmen për zgjidhjen e këtij problemi.

“Edhe pse fushate pas fushate, kryetari Ahmeti ka premtuar që do ta zgjidhë problemin e ujit të pijshëm për të gjithë territorin e komunës së Lipjanit, andaj jemi në fund të mandatit të tretë dhe komuna nuk ka bërë asnjë hap asnjëherë për të realizuar elementin kryesor jetësor për qytetarët siç është uji. Ne si opozitë, sa herë që është hartuar buxheti komunal, vazhdimisht kemi kërkuar që komuna të ketë një ndër prioritetet kryesore të qeverisjes shtrirjen e rrjetit të ujësjellësit nëpër lokalitete,  por që kërkesat tona janë injoruar dhe e kemi gjendjen siç e kemi”, ka kritikuar Bytyqi.

Sipas saj, shkaku i neglizhencës së kryetarit Imri Ahmeti shumë fshatra të Komunës së Lipjanit jane ende pa rrjet të ujësjellsit.

“Përveç fshatrave si Zllakuqani, Ribari i Madh, Bregu i Zi, Grackë e Vogël, Resinoc, Baicë, Mirenë etj, në Shalë është jashtë funksionit tash e sa kohë e në Janjëve nuk ka furnizim të mjaftueshëm për shkak të mos zgjerimit të rrjetit”, ka kritikuar Bytyqi.

Ndërkaq, kritika rreth kësaj çështje ka ngritur edhe Shahadije Bikliqi, kuvendare nga radhët e Lëvizjes Vetëvendosje në Lipjan.

“Është shqetësuese se pas tre mandateve shumë fshatra dhe qyteti i Lipjanit përballen me mungesë të ujit të pijshëm. Në Janjevë ekziston rrjeti por ka mungesë të ujit, ndërkaq situata e ngjashme është  edhe në Shalë dhe në disa fshatra të tjera. Me telashe më të mëdha përballen banorët e fshatrave Bujan, Bregu i Zi, Ribar i Madh , Zllakuqan , Grackë e Vogël e të tjera”, ka thënë Bikliqi.

Në anën tjetër Komuna e Lipjanit gjatë së martës nuk u është përgjigjur pyetjeve të telegrafit lidhur me këtë çështje./ Telegrafi/