​Dështon shqyrtimi i raportit vjetor së Zyrës Kombëtare të Auditimit, mungon ministrja Bajrami

Mbledhja e Komisionit për Mbikëqyrje të Financave Publike me të vetëm pikë të rendit ditës për shqyrtimin e raportit vjetor të Zyrës Kombëtare të Auditimit për vitin 2019, ka dështuar të mbahet sot për shkak të mospjesëmarrjes së ministres së Financave, Hykmete Bajrami.

Ndërsa, i pranishëm ishte auditori përgjithshëm, Besnik Osmani.

Kryetari i këtij Komisioni, Bedri Hamza ka thënë se në momentin e fundit, ministrja Bajrami ka anuluar pjesëmarrjen.

Hamza tha se ministrja Hykmete Bajrami është përgjegjës për adresimin e këtyre të gjeturave në raport, prandaj, duhet t’i përgjigjen ftesës.

Ai tha se arsyetimi me shkrim i Ministrisë së Financave në momentin e fundit, në orën 11:00, ishte se për shkak të një situate urgjente, ajo nuk mund të jetë sot në mbledhje të Komisionit, edhe pse ajo ka shpreh gatishmërinë të jetë pjesëmarrëse në një prej mbledhjeve të ardhshme.

Komisioni vendosi që të enjten në orën 11:00 të mbahet mbledhja dhe të jetë e pranishme edhe ministrja e Financave.

Edhe deputetja Besa Gaxherri nga LDK ka kërkuar që për raportin e Auditorit duhet të jetë e pranishme edhe ministrja e Financave. /KP/