Dështon për të tretën herë seanca urgjente e Kuvendit Komunal në Gjilan, Hyseni: Ende nuk kemi reflektim nga opozita

Për të tretën herë radhazi, ka dështuar të mbahet seanca urgjente e Kuvendit të Komunës së Gjilanit, e ftuar nga kryetari i Komunës, Alban Hyseni, pasi asambleistët e partive opozitare (LDK, me përjashtimi të njërit, PDK dhe AAK), nuk kanë qenë të pranishëm në sallë.   

Kryesuesi i Kuvendit, Kushtrim Kadriu, tha se me 12 asambleistë të pranishëm nuk ka kuorum për të nisur kjo seancë.

Përndryshe, kjo seancë urgjente ishte ftuar nga kryetari i Gjilanit me dy pika të rendit të ditës, miratimi i buxhetit për vitin 2025 dhe ndërrimi i destinimit të shfrytëzimit dhe dhënia në shfrytëzim të fshatit social të Kuvajtit “EuroSky”.

Pas dështimit të seancës, kryetari Hyseni mbajti një konferencë të jashtëzakonshme për media, duke theksuar rëndësinë e miratimit të buxhetit.

“Po vazhdojmë të rrezikojmë projektet dhe pagat e sektorit publik, por më e keqja është se nuk po ka reflektim. Sot patëm vetëm një asambleist nga opozita pasi përfundoi seanca,” tha Hyseni, duke potencuar se Komuna e Gjilanit vazhdon të jetë në një situatë urgjente për aprovim të buxhetit.

Ai shtoi se gjatë javës së ardhshme do të analizojnë situatën dhe se përpjekjet për të mbajtur seanca të tjera urgjente do të vazhdojnë.

Në këtë konferencë foli edhe drejtori i Drejtorisë së Arsimit, Shpend Nuhiu, i cili ngriti shqetësime mbi ndikimin e mosmiratimit të buxhetit.

“Mosmiratimi i buxhetit po krijon vështirësi të mëdha, sidomos në shpalljen e përfituesve të bursave për studentët. Gjithashtu, ka paqartësi tek mësimdhënësit për pagat në muajt e ardhshëm,” theksoi Nuhiu, duke shtuar se shumë qytetarë po kërkojnë sqarime mbi situatën.

Pozita u bëri thirrje asambleistëve opozitarë që të marrin pjesë në seancë dhe të votojnë buxhetin për qytetarët e Gjilanit. /Telegrafi/