Dështon mbledhja e Kryesisë, opozita thotë se është urgjente që të ndodh debati parlamentar për gazsjellësin

Mbledhja e Kryesisë së Kuvendit ka dështuar për shkak të mungesës së kuorumit. Shefi i Grupit Parlamentar të AAK-së, Besnik Tahiri tha se në këtë mbledhje munguan nënkryetarët.

Ai shtoi se është në urgjencë që të ndodh debati parlamentar lidhur me gazsjellësin.

“Dua të ritheksoj që për ne si grup parlamentar është jashtëzakonisht me urgjencë që të ndodh debati parlamentar dhe Kuvendi të miratoj një rezolutë. Qeveria nuk ka dhënë asnjë argument tjetër. Me urgjencë duhet të rikthehet ky vendim sepse është duke i bërë dëm të madh të Kosovës”, ka thënë Tahiri.

Edhe shefi i Grupit Parlamentar të PDK-së, Abelard Tahiri tha se debati parlamentar për këtë çështje është i mirëseardhur.

“Ne e kemi theksuar se është debat i mirëseardhur. Qeveria ka bërë gabim strategjik sa i përket këtij aspekti. Gabim strategjik duhet të sanohet dhe të evitohet sa më parë. Kosova është i vetmi vend në rajon që nuk është i përfshirë në rrjedha të tilla të gazit”, ka thënë Tahiri.

Ai ka shtuar se si deputet të opozitës duhet ti ndërmarrin të gjitha hapat që të parandalojnë dëmet e mëtutjeshme që i ka shkaktuar kjo Qeveri në raport me gazin.

Tahiri theksoi se  pozita nuk ka vullnet të jetë pjesë e punimeve të Kuvendit pas rezultatit të zgjedhjeve lokale.

“Sot ishte paraparë të kemi mbledhjen e Kryesisë, por siç duket pas zgjedhjeve të fundit, nuk kanë agjendë. Ftoj që të jenë prezent në mbledhjet tjera dhe mendoj që i kontribuojmë demokracisë së vendit. Në seancën e radhës ishte paraparë të zgjidhen dy gjyqtarë, pastaj që kemi dy vendet vakante në Gjykatën Kushtetuese, dhe e dini se aty nuk munden të mbahen mbledhjet për shkak të mungesës së gjyqtarëve. Si PDK, jemi gati që ta dërgojmë në Prokurori, pasi konsiderojmë që Qeveria ka bërë vepër penale, në lidhje me marrëveshjen ndërmjet ministrisë së arsimit dhe Qeverisë austriake, ku e njëjta nuk është ratifikuar në Kuvend por që ka filluar të implementohet. Ne kemi informata për këtë dhe do ta ftojmë në raportim ministren të na tregojë në detaje për këtë marrëveshje”, tha Tahiri. /Telegrafi/