Dështimi në Ligën e Kampionëve, Atletico nxjerr në shitje katër yjet e skuadrës

Atletico Madrid ka qenë befasia më e keqe këtë edicion në fazën e grupeve të Ligës së Kampionëve.

Gjiganti spanjoll nuk ka arritur të kaloj grupin, por as të bie në Ligën e Evropës duke u eliminuar tërësisht nga garat evropiane.

Los Colchoneros ishin në një grup me Porton, Club Brugge dhe Bayer Leverkusen, por përkundër se ishin favoritë për ta fituar grupin, ata përfunduan të fundit.

Eliminimi ka qenë shumë i rëndë për madrilenët të cilët pritet t’i largojë katër nga yjet e skuadrës qysh në afatin kalimtar të janarit.

Sipas asaj që kanë raportuar mediat spanjolle, bordi i klubit ka vendosur t’i nxjerr në shitje katër yjet si Joao Felix, Rodrigo de Paul, Thomas Lemar dhe belgun Yannick-Carrasco.

Nga shitja e këtyre katër lojtarëve Atletico pretendon të fitojë mbi 200 milionë euro, pasi vetëm Joao Felix ka një vlerë mbi 100 milionë.

Për të gjithë futbollistët në fjalë ka interesime nga top skuadrat, derisa Felix është prioritet i Bayern Munich dhe Manchester United.

Sa i përket Rodrigo de Paul, e ardhmja e tij mund të jetë sërish në Serie A me Romën, Juventusin dhe Milanin që kanë shprehur interesim.

Ndërkohë për dyshen Thomas Lemar dhe Yannick-Carrasco, oferta të shumta ka nga Anglia dhe Franca. /Telegrafi/