Deputeti gjerman: Thaçi e Vuçiq si dy princër feudalë

Deputeti gjerman socialdemokrat, Josip Juratoviq, është një nga njohësit më të mirë të ish-Jugosllavisë.

Në intervistën për Deutche Welle, ai kritikon ashpër planin Thaçi-Vuçiq: Jo vetëm pasojat që janë të paparashikueshme, por këtij plani i mungon legjitimeti, thotë Juratoviq dhe ankohet për dy politikanët që sillen me popullin e tyre si në feudalizëm.

“Jemi kundër ndryshimit të kufijve në Europë. Pasojat do të ishin fatale. Në Bosnje e Hercegovinë, qysh tash disa po gëzojnë për ndryshime të kufijve. Maqedonia mund të vihej në rrezik dhe më pas do të shtrohej pyetja se çfarë do të ndodhte me Ukrainën, me Krimenë, e kështu me radhë”, tha Juratoviq.

“Nëse do t’i lejonim të gjitha grupimet separatiste që të vinin kufij të rinj, do të kishim 40 shtete të reja në Europë. Merret me mend se çfarë mund të ndodhë”, shtoi ai.

Madje Juratoviq ka dhënë vërejtje edhe ndaj dy presidentëve që po e drejtojnë dialogun Kosovë- serbi, Hashim Thaçit e Aleksandar Vuçiqit.

“Problem tjetër është legjitimiteti: kush po e bën këtë? As Kosova as Serbia nuk janë shtete presidenciale. Pra kemi dy presidentë që bëjnë ujdi si dy princër feudalë dhe këmbejnë territore me gjithë bujkrobërit, pra popullin. Kjo nuk mund të merret seriozisht në shekullin 21”, tha Josip Juratoviq.