Dembele ka shpjeguar arsyen pse ai ekzekuton penalltitë me këmbën e tij ‘të dobët’ pasi PSG eliminoi Liverpoolin

Ylli i Paris Saint-Germainit, Ousmane Dembele, ka shpjeguar pse ai ekzekuton penallti me këmbën e tij më të dobët, pasi mahniti tifozët me mënyrën se si goditi nga pika e bardhë ndaj Liverpoolit të martën mbrëma.

Dembele e barazoi rezultatin për PSG-në me një goditje në minutën e 12-të dhe ndeshja argëtuese në Anfield shkoi deri në kohën shtesë dhe penalltitë, ku ishte skuadra e Luis Enrique që mbizotëroi.

Skuadra parisiene ishte e patëmetë nga 12 metra, me Desire Doue që shënoi penalltinë e fitores pasi Gianluigi Donnarumma priti gjuajtjet e Darwin Nunez dhe Curtis Jones.

Pati disa penallti të bukura nga ana e PSG-së, por asnjë nuk ishte më e mirë se ajo e Dembeles.

Reprezentuesi francez u rreshtua sikur do të ekzekutonte penalltinë me këmbën e majtë, për të kaluar më pas në këmbën e djathtë dhe për ta goditur topin në këndin e sipërm.

Shumë vite më parë, kur ai luante për Rennes, një intervistues e pyeti Dembelen nëse ishte majtak apo djathtak, të cilit ai u përgjigj: “Majtak? Unë jam më majtak”.

Por më pas gazetari vuri në dukje se penalltitë i godet me këmbën e djathtë dhe e pyeti pse, për të cilën Dembele tha: “Sepse gjuaj më mirë me këmbën e djathtë”.

Shkathtësia e Dembeles me të dyja këmbët e bën shumë të vështirë dhe të paparashikueshëm për portierët që të hamendësojnë se në cilën anë do të përpiqet të gjuajë. /Telegrafi/