Del në ankand “Margaritari i luanit të përgjumur”

Perla më e madhe natyrale e ujërave të ëmbla, e cila për një periudhë kohe i përkiste mbretëreshës Ekaterina e II-të e Rusisë, pritet të dalë në ankand në Holandë në fund të muajit, njoftoi sot kompania e ankandeve ”Venduehuis”.

E njohur nën emrin “Sleeping Lion pearl” (Margaritari i luanit të përgjumur) – për shkak të formës – ky grupim perlash me një gjatësi rreth shtatë centimetrash dhe me një peshë rreth 120 gramë, me shumë gjasa është formuar në gjysmën e pare të shekullit të XVIII-të në ujërat kineze, ndoshta edhe në Rivierën e Perlave ku grykëderdhja ndodhet në Detin e Kinës Jugore.

Sipas kompanisë së ankandeve ”Venduehuis”, kjo është një nga tri perlat më të mëdha natyrale të ujërave të ëmbla apo të molusqeve të njohura në mbarë botën.

Çmimi i saj vlerësohet mes 340-540 mijë euro. Në vitin 1765, perla u transportua deri në Batavi (sot Xhakartë, kryeqyteti i Indonezisë) nga një tregtar holandez.

”Trembëdhjetë vite më vonë perla doli për shitje në ankand në Amsterdam dhe u ble nga Ekatarina e Madhe e Rusisë”, bëri të ditur ”Venduehuis” në një deklaratë.

Mbretëresha e ruajti këtë margaritar në pallatin ”Hermitage” në Shën Petërburg deri në vitin 1796. Në periudhën e trazuar që u pasua me vdekjen e saj, u zhduk dhe gjurmët e saj u gjendën më pas në Poloni.

Perla u ble në vitin 1865 nga një argjendar holandez dhe qëndroi në familjen e tij për breza me radhë. Ajo u ble në 1979 nga ‘’Shoqëria e Perlave të Amsterdamit’’ për qëllime kërkimore dhe historike. Është pikërisht kjo kompani që e nxjerr në ankand më 31 maj në Hagë. /ATA/