Deklaratat e presidentit serb lidhur me njohjen e Kosovës acarojnë deputeten gjermane, Alt: Vuçiq na paska mashtruar

Kryetarja e Komisionit për të Drejtat e Njeriut dhe Ndihmën Humanitare në Bundestagun gjerman, deputetja e Partisë Liberale Gjermane (FDP) Renata Alt, ka reaguar pas deklaratës së Aleksandar Vuçiq në lidhje me njohjen e Kosovës.

Reagimi i deputetes gjermane vjen pasi presidenti serb Aleksandar Vuçiq, në konferencën e sotme për shtyp, pas takimit me kancelarin gjerman, Olaf Scholz, deklaroi se sot për herë të parë ka dëgjuar se po kërkohet njohje reciproke me Kosovën, duke thënë se “këtë nuk e kemi dëgjuar nga Evropa deri më tani”.

“Ne sot dëgjuam se po kërkohet njohja reciproke. Ne kurrë më herët nuk kemi dëgjuar nga askush nga Evropa se po kërkohet njohja reciproke. Këtë e dëgjuam sot në konferencën për gazetarë në Prishtinë”, tha Vuçiq.

Lexo po ashtu Vuçiq: Për herë të parë dëgjuam se kërkohet njohja reciproke me Kosovën – Scholz ishte i ashpër për sanksione ndaj Rusisë

Lidhur me këtë ka reaguar deputeja e Bundestagut gjerman Renata Alt, përmes një postimi në Twitter, duke thënë se “Reagimi i Presidentit të Serbisë gjatë konferencës për media mbi kërkesën për njohje të Kosovës është skandaloz”.

“Negociatat e anëtarësimit në Bashkimin Evropian me Republikën e Serbisë duhet të ngrihen. Aleksandar Vuçiq na paska mashtruar për një kohë të gjatë”, ka shkruar Alt, transmeton Telegrafi.

Reaktion d. Präsidenten von #Serbien während der Pressekonferenz auf die Forderung nach der Anerkennung des #Kosovo ist unverschämt. Die Beitrittsverhandlungen der #EU mit 🇷🇸 müssen eingefroren werden! #Vucic hat uns viel zu lange an der Nase herumgeführt.

— Renata Alt (@RenataAlt_MdB) June 10, 2022

Kancelari gjerman, Olaf Scholz sot në konferencën për media pas takimit me kryeministrin Albin Kurti tha se Kosova dhe Serbia duhet të angazhohen në dialog, duke kërkuar kështu nga të dyja palët zotim të qartë, konstruktivitet dhe pragmatizëm.

Lexo po ashtu Scholz kërkon nga Kosova e Serbia që të angazhohen për dialog, thotë se marrëveshja përfundimtare duhet të zgjidh çështjen e njohjes  

Scholz theksoi se dialogu është shumë i rëndësishëm dhe se marrëveshja politike ndërmjet Kosovës dhe Serbisë duhet të zgjidh edhe çështjen e njohjes së Kosovës.

“Kosova dhe Serbia përmes një marrëveshjes gjithëpërfshirëse të gjejnë një zgjidhje politike. Dialogu është rruga që i hap Kosovës perspektivën evropiane… E qartë është që marrëveshja duhet të zgjidh çështjen e njohjes së Kosovës”, tha ai.

Kancelari gjerman tha më tej se është e paimagjinueshme që dy vende të bëhen anëtare të BE-së e nuk e njohin njëra tjetrën. /Telegrafi/