Dauti: Shkollat në Tetovë rrezikojnë të mbeten pa ngrohje

Sektori për Arsim i Komunës së Tetovës ka reaguar sot ndaj shkurtimit të buxhetit për shkollat nga ana e Ministrisë së Arsimit. Nga kjo komunë kërkojnë nga Ministri që ta rishqyrtojë vendimin sepse në të kundërtën shkollat do hyn në kolaps. Kështu deklaroi Nazmi Dauti, shef i sektorit për arsim në komunën e Tetovës.

Dauti tha se me këto mjete të shkurtuara shkollat nuk do të kenë mundësi të furnizohen as me lëndë djegëse për ngrohje.

“Në krahasim me buxhetin e vitit paraprak, këtë vit kemi 93.5 për qind të bllok dotacionit të propozuar nga ministria të shkojnë vetëm për rrogat regresin dhe pensionimet që parashihen në shkollat tona, ndërsa vetëm 6.5 për qind mbetet me çka shkollat do duhet të funksionojnë, e këtu përfshihen nxemja, furnizimi me lëndë djegëse, pagesa e faturave të energjisë, mbeturinave, ujit dhe materialeve të tjera të nevojshme për shkollat e Tetovës.

Me këtë buxhet shkollat janë tej mase të dëmtuara dhe është problematike që me këtë buxhet të funksionojnë shkollat. Është e vërtetë pra dëmtohet e ardhmja jonë, shkollat tona dhe ne do presim një reagim zyrtar nga ministria dhe do dërgojmë edhe zyrtarisht shkresë në Ministri, dhe pas marrjes së përgjigjes do shohim për masat e mëtejme”, deklaroi Nazmi Dauti./Alsat/